"Çempionatımızda dövran dəyişib. İndi bütün komandalar meydana qələbə üçün çıxır. Deyərdim ki, sonuncu pillədə olan komanda birinci sıradakı rəqibini məğlub edə bilər. Maraqlıdı ki, buna çox vaxt İngiltərə çempionatında rast gəlirik. Məncə, "Zirə" çox güclənib. Onlar son oyunlarda ardıcıl xallar qazanır. Bu komandada qol vurmağı bacaran futbolçular var. 4-cü pillədə olan "Turan Tovuz" dünən xal itirdi. Rəşad Sadıqovun komandası buna görə arxayınlaşacaq, yoxsa mövqeyini möhkəmləndirməyə çalışacaq? Əsas məqamlardan biri də budu. Ümumiyyətlə, "Zirə" müdafiə xəttində də çox inamlı oynayır. Bu komandaya bir-iki epizod lazımdı ki, lazım olan qolu vursun. Hesabı qorumağı bacarırlar. "Qarabağ"a gəlincə, belə keyfiyyətli kollektivlər hansısa oyunda uduzanda növbəti matça daha ciddi hazırlaşmağın vacibliyini dərk edir və əksər hallarda məqsədinə çatır. Adətən "qara zolağ"a düşməkdən uzaq olurlar. Düzdü, "Qarabağ" ardıcıl məğlubiyyətlər yaşadı. Yunanıstandan yorğun qayıdıblar. Lakin komanda meydana tam hazır vəziyyətdə çıxacaq. Qurban Qurbanovun heyəti genişdi. O, özünü yaxşı hiss edən futbolçulara şans verməklə istəyinə çata biləcək. Məncə, hər şey "Qarabağ"ın motivasiyalı olub-olmamasından asılıdı. "Zirə" hansı boşluqlardan istifadə edə bilər? "Qarabağ" son oyunlarda həm hücum, həm də müdafiədə çox sadə səhvlərə yol verir. Bu kollektivə onu deyə bilərəm ki, Avropa Liqasında yaşananları unudub irəliyə baxsınlar. "Zirə" isə "Qarabağ"ın xüsusilə standart vəziyyətlərdə buraxdığı səhvlərdən faydalanmalıdı. Bunu çempionatda ən yaxşı bacaran komanda "Turan Tovuz"du. Qolların əksəriyyətini künc zərbəsi sayəsində vurublar. Futbolun qanunlarından istifadə etmək lazımdı".