Bugünlərdə heyətini Momo Yansane ilə gücləndirən “Sumqayıt” tezliklə növbəti transfer xəbərini elan edəcək.

“Football-plus.az” xəbər verir ki, bu barədə klubun mətbuat xidməti məlumat yayıb. İctimaiyyətə təqdim edilən videoda baş məşqçi Vaqif Cavadovun “bir oyunçumuz yoldadı, gələcək” sözlərinə istehzayla yanaşan, “Ronaldonu alıblar” deyə rəy yazan azarkeşlərin fikirləri yer alıb.

Məsələnin maraqlı tərəfi isə “kimyaçılar”ın həqiqətən Ronaldonu transfer etməsidi. Sadəcə, burda söhbət “Əl-Nəsr”in dünya şöhrətli ulduzundan yox, Ronaldo Vaskesdən gedir. 25 yaşlı hücumçunun sonuncu klubu “Quabira”di (Boliviya).

O, KONKAKAF Millətlər Liqasının cari mövsümündə meydana çıxdığı 6 matçda 3 qol, 1 məhsuldar ötürmə müəllifi olub. “Quabira”nın heyətində 2023/24 “futbol ili”ndə bütün turnirlər üzrə 32 matçda iştirak edən oyunçu 4 qol, 6 məhsuldar ötürməylə yadda qalıb.

“Transfermarkt”a görə, futbolçunun dəyəri 350 min avrodu.

KƏNAN BAHADIR