Sən dözərsən ağrısına,
Daş dözməz, daş haray eylər.
O daşlardan Tanrı sənə
Bir ev tikər, saray eylər... (Ramiz Rövşən)

Bir neçə il əvvəlin söhbətidi. “Qarabağ” “Sabah”ı Respublika stadionunda qəbul edirdi. Hesabı xatırlamıram, amma dəqiq yadımdadı ki, oyun “köhlən atlar”ın qələbəsiylə yekunlaşdı. Özü də “Qarabağ”ın üstünlüyü təkcə hesabda əks olunmur, 90 dəqiqənin gedişi də bu üstünlükdən xəbər verirdi.

Qurban Qurbanovun komandası dəfələrlə künc zərbəsi vurmaq hüququ qazandı, amma bu fürsətlərin heç birini qola çevirmək mümkün olmadı. Elə bunu nəzərə alaraq oyunsonrası mətbuat konfransında həmin məqamı Qurban bəyin diqqətinə çatdırdım, künc zərbələrini qola çevirmək üçün “ev tapşırığı” hazırlamaq fikrində olub-olmadığını soruşdum. Təcrübəli çalışdırıcı sualımın cavabında daim bu istiqamətdə çalışdıqlarını, vəziyyəti yaxşılığa doğru dəyişdirməyi arzuladıqlarını demişdi.

Görünən odu ki, ötən müddət ərzində Qurbanov istəyinə çatmayıb, “Qarabağ”ın futbolçuları künc zərbəsindən qol vurmağı öyrənə bilməyiblər. FKSB ilə “Qarabağ”ın daha bir zəif nöqtəsini üzə çıxardı. “Köhlən atlar” təkcə öz qazandıqları künc zərbələrini boşa vermirlər, həm də rəqibin yerinə yetirdiyi belə standart vəziyyətlər zamanı necə davranmaq lazım olduğunu, rəqibin təhlükəni böyütməsinə əngəl olmağı bacarmırlar. Elə bu səbəbdən də Avropa Liqasının qrup mərhələsində bu mövsüm evdəki sonuncu oyun bizim üçün məğlubiyyətlə nəticələndi. Halbuki, soyuq havada Respublika stadionunun tribunalarına toplaşan azarkeşləri sevindirmək üçün əla fürsət var idi. Rəqibin müdafiəsindəki boşluqları lazımınca dəyərləndirməyi, iki dəfə hesabda önə keçməyi bacarsaq da, bu üstünlüyü qorumağı bacarmadıq.

“Qarabağ” 2:3 hesabıyla məğlub olduğu oyunda 7 dəfə künc zərbəsi vurmaq hüququ qazandı. Təəssüf ki, bu zərbələrin heç birini qola çevirmək mümkün olmadı. Əvəzində rəqib 4 dəfə belə fürsətə sahib oldu, bunların üçündə Buntiçin qoruduğu qapının torunu silkələdi. Bu qollara üzülən isə təkcə Buntiç deyildi, “Qarabağ”a könül verən milyonlarla azərbaycanlının ürəyindən həmin dəqiqələrdə qara qanlar axdı. Adamı yandıran odu ki, “Qarabağ” rəqibdən təkcə künc zərbələrinin sayına görə üstün olmayıb. Topa sahibolmada da Qurban Qurbanovun komandası Rumıniyadan gələn qonaqları üstələyib, özü də iki dəfə. Amma bu məqamla bağlı üstünlüyümüz də hesabda əksini tapmayıb. Topa sahidolmadakı üstünlüyün sayəsində rəqibi iki dəfə cəzalandıra bilmişik. Rumınların yalnız künc zərbəsindən sonra fərqlənə bilməsi müdafiədə elə də səliqəsiz oynamadığımızın, oyuna nəzarətin “Qarabağ”ın əlində olmasının göstəricisi sayılmalıdı.

“Qarabağ”ın adlı-sanlı rəqibdən daha yaxşı oynamasını təkcə biz iddia etmirik. FKSB-nin baş məşqçisi Elias Xaralambus da qələbədə bəxt amilinin rol oynadığını gizlətməyib. Sitat:

Klubun prezidenti Cici Bekali də baş məşqçiylə həmfikirdi, özü də artıqlamasıyla:


Belə təriflər “Qarabağ”la oyundan öncə səslənsəydi, deyərdik ki, rəqib bizi arxayınlaşdırmaq istəyir. Qələbədən sonra rəqibin “Qarabağ” haqda bu fikirdə olması reallığın sözlə ifadəsidi. Amma əvvəl qeyd etdiyim kimi, hətta rəqibin belə etiraf etdiyi üstünlük, yaxşı oyun nəticəni dəyişə bilmir. Qələbə qazanmaq üçün qol vurduq, öz qapımızdan isə daha artığını buraxdıq.
“Qarabağ” azərbaycanlı azarkeşlərin tələbatını yüksəldib, onların daha böyük uğurlar arzulamasına vasitəçi olub.

İndi elə həmin azarkeşlər ağına-bozuna baxmadan “Qarabağ”ı, onun baş məşqçisi Qurban Qurbanovu tənqid edir. Özü də bunu böyük həvəslə həyata keçirirlər. Saytlar sorğu keçirir, səhifələr müzakirə açır, hamı günahkar axtarır. Az qalıblar ki, Azərbaycan futbolunun bütün problemlərini Qurban Qurbanovun üzərinə atsınlar. Onun isə “günahı” “Qarabağ”ı avrokubokların qrup mərhələsinin daimi iştirakçısına çevirməsidi. Sağlıq olsun, Qurbanov azarkeşləri yeni qələbələrə sevindirəndə bugünlər də unudulacaq.

AMAL