Qış fasiləsində adı transfer xəbərlərində daha çox hallanan futbolçulardan biri də Leroy Mikelsdi.

Almaniyalı futbolçunun bir müddətdi “Sabah”, “Neftçi” və “Araz-Naxçıvan”ın diqqət mərkəzində olduğu deyilir. Hətta legionerin meneceri qəzetimizə açıqlamasında danışıqların davam etdiyini də demişdi. Lakin Mikelsin üç klubdan hansına keçəcəyinə, yaxud “Şamaxı” ilə davam edəcəyinə dair dəqiq məlumat yoxdu. Baş tutarsa, qış fasiləsinin səs-küylü transferlərində sayılacaq. Dünən Leroyla həm transferi, həm də legioner həyatı ilə bağlı söhbətləşdik. 29 yaşlı yarımmüdafiəçi “Futbol+”ə maraqlı açıqlamalar verdi.

- Azərbaycanda ilk dəfə təlim-məşq toplanışı qatılmısan. Hazırlığı necə dəyərləndirirsən, toplanış sənin üçün necə keçir?
- Düşərgədə hər şey yaxşıdı. Bizdə yaxşı komanda ruhu var və hamı yaxşı hazırlaşır. Ümumi təəssüratlarım müsbətdi.

- Qış hazırlığı çərçivəsində ilk yoxlama görüşündə “Zirə”yə 1:3 uduzduz...
- İlin ilk oyunu idi. Bu oyunlar nəticə yox, fiziki baxımdan önəmlidi. İstənilən halda rəqibimiz də avrokuboklara vəsiqəyə iddialıdı. “Zirə” yaxşı formalaşmış komandadı, güclü heyəti var. Bu oyundakı səhvlərimizin üzərində çempionat başlayana qədər işləyəcəyik.

- Qısa zamanda Azərbaycanda parladın, diqqəti cəlb edə bildin. Bura gələrkən bunu hədəfləmişdin?
- Məqsədim yaxşı oyunçu olduğumu göstərmək idi. Bunu qısa müddətdə göstərdiyimi düşünürəm. Amma bundan daha yaxşı oynaya bilərəm. Gələcəkdə də bunu göstərəcəm.

- Karyeran boyunca Almaniyanın müxtəlif liqalarında mübarizə aparmısan. Orda rəqabət aparmaq sənin üçün niyə çətin idi? Yəqin xəbərdarsan ki, millimizin üzvü Mahir Emreli Almaniya ikinci bundesliqasında forma geyir.
- Almaniya böyük futbol ölkəsidi. Mən Münhenqladbax “Borussiya”sı kimi böyük bir klubda formalaşdığıma görə xoşbəxtəm. Almaniyadakı ikinci liqa çox rəqabətlidi, taktiki və fiziki cəhətdən yüksək səviyyədədi. Lakin mənə liqaları müqayisə etmək çətindi. Onu deyə bilərəm ki, Azərbaycanda futbol Almaniya ilə müqayisədə daha hücumameyillidi.

- Adamlar səni Ayxan Abbasovun kəşf etdiyini düşünürlər. Bu şöhrətə görə kimə borclusan?
- İlk növbədə, əlbəttə, məşqçimə. Ayxan müəllim məni Azərbaycana gətirdi və ilk gündən mənə inandı. Mən, sadəcə, onun mənə olan etibarını qaytarıram. Qardaşım Coy-Lens isə bu çempionata yaxşı bələddi, bu mövzuda mənə xeyli kömək olub.

- Hazırda “Sabah”, “Neftçi” və “Araz-Naxçıvan”dan təklif aldığın deyilir. Danışıqların davam etdiyini nəzərə alıb sualı belə quracam: sənin üçün klubun statusu, ödədiyi pul, yoxsa sənə verəcəyi şans daha önəmlidi?
- Təbii ki, futbolçu kimi ən yaxşı komandada oynamaq istəyirəm. Avropada oynamaq əsas istəyimdi. Amma mən hazırda “Şamaxı”da oynayıram. Ona görə də dəyişiklik olanda bunun ətrafında geniş danışa bilərəm.

- İndi “Şamaxı”nın heyəti elə də güclü deyil. Amma “Sabah” kimi güclü kluba keçəcəyin halda ordakılarla, elə qardaşınla rəqabət aparmağa özünü hazır sayırsanmı?
- “Şamaxı” güclü komandadı, mən öz komandamla fəxr edirəm. Biz premyer-liqaya gələn komandayıq və indi cədvəldə həqiqətən yaxşı yerdəyik. Məsələn, “Neftçi”dən öndəyik. Bəli, “Sabah” böyük komandadı. Amma mən heç nədən və heç kimdən çəkinmirəm. Öz keyfiyyətlərimi yaxşı bilirəm və premyer-liqada hər kəslə rəqabət apara biləcəyimi düşünürəm.

- Mövsümün əvvəlində Ayxan Abbasov səni çətinliklə Azərbaycana gətirdiyini demişdi. Elə sən özün də müsahibələrinin birində “Şamaxı”nın məhz “Sabah”la müqayisədə çox aşağı səviyyədə olduğunu demişdin. Bura, bu kluba gəlmək fikrini qəlbinin dərinliklərində yenidən sorğuladığın olubmu? Ümumiyyətlə, nə kimi çətinliklərlə rastlaşdın?
- Mövsüm başlamamış müxtəlif ölkələrdən təkliflər aldım. Amma sonda Ayxan Abbasovun inadkarlığı məni heyran etdi və bura gəlməyə qərar verdim. Buna görə peşman deyiləm. Əsas mənə inamın olmasıydı ki, bu da başqa çətinliklərin qarşısını kəsirdi.

- İndi avrokuboklar uğrunda bir neçə komanda mübarizə aparır. Avropaya kimlərin yollanacağını düşünürsən? Futbolçu olaraq, belə hədəfin varmı?
- “Araz-Naxçıvan”la “Turan Tovuz”a çox hörmət edirəm, onlar indiyə qədər yaxşı mövsüm keçirdilər. Amma “Zirə” və “Sabah” kimi böyük klublar indi onları ovlayacaqlar. Görək sonda kim Avropada olacaq. Əlbəttə, bu mənim də məqsədimdi.

- Üçüncü qardaşın Coy-Slaydı da Azərbaycana gətirməyi düşünürsüzmü? Yəni gələcəkdəsiz üç qardaşın hamısını premyer-liqada görə bilərikmi?
- Düşünürəm ki, qardaşım Slayd da yaxşı məşqçi ilə yaxşı komandada yaxşı təsir bağışlaya bilər. Çünki oyun üslubumuz oxşardı. Bəlkə də gələcəkdə Azərbaycanda elə şey baş verə bilər. Bu futboldu, futbol ani verilən qərarlardan ibarətdi.

- Danışıqlar istənilən kimi getməsə, “Şamaxı”da qalmağa necə baxırsan? Karyeranla bağlı yayaqədərki və ümumi planların nədi?
- Hazırda “Şamaxı”da oynayıram. Amma dediyim kimi, hər bir futbolçu ən yaxşı oyunçularla yarışmaq və dolu stadionun qarşısında oynamaq istəyər. Azərbaycanı sevirəm və burda uzun müddət qalacağıma ümid edirəm. Amma futbolda, təəssüf ki, gələckdə səni nə gözlədiyini heç vaxt bilmirsən.

RÖYANƏ OĞUZ