''Karyeramı bitirdikdən sonra bir müddət məşqçilik kurslarına qatıldım. Bundan başqa ailəmlə vaxt keçirərək dincəldim. Son dönəmlərdə gənc oyunçuların meneceri kimi fəaliyyət göstərməyə başlamışam. Çox gənc yaşımda Türkiyəyə yollanmışdım. Amma ''Beşiktaş''da bir-birindən gözəl və unudulmaz illər keçirdim. Əslində ''Kayserispor''dakı karyeramın da uğurlu alındığını düşünürəm. O klubda oynamaq da mənə böyük zövq verirdi. Amma ''Alanyaspor''dakı karyeram daha çox meydandan kənar olaylar üzündən istənilən şəkildə alınmadı. Bu günə qədər də ''Beşiktaş'' tarixinin ən çox qol vuran əcnəbi futbolçusuyam. Belə bir nəhəng klubda bu cür statusa malik olmaq mənim üçün böyük qürurdu. Qollarımla həqiqətən də bir dönəmə damğa vurdum və titullar qazandıq. ''Fənərbaxça''ya qarşı derbidə və ''Liverpul''a vurduğum qollar mənim üçün özəldi. O qolları heç vaxt unutmayacam. ''Liverpul''u evdə məğlub etdiyimiz oyunda fanatlarımızın təzahüratları hələ də sanki qulağımdadı. Həmin oyun həqiqətən də karyeramda xüsusi yer tutur. ''Beşiktaş''da oynadığım dönəmdə bizim üçün ən çox Kayseri səfərləri çətin keçirdi. Çünki o dönəmdə ''Kayserispor''un həqiqətən də yaxşı komandası var idi. Türkiyə çempionatını imkan düşdükcə izləyirəm. Görünən odu ki, bu mövsüm də ''Qalatasaray'' çempion olacaq. Amma ''Beşiktaş''ın yaxşı bir seriya yaxalayıb yuxarı pillələrə qayıdacağını düşünürəm. Fürsətdən istifadə edərək ''Beşiktaş'' fanatlarına da salamlarımı göndərirəm. Onların hər zaman qəlbimdə xüsusi yeri var. Yeri gəlmişkən, bu yaxınlarda İstanbula gəlməyi və ''Beşiktaş''ın ev oyununu ziyarət etməyi planlaşdırıram. Bu klubu heç vaxt unutmayacam''.