Səudiyyə Ərəbistanı təmsilçiləri türkiyəli məşqçilərə maraq göstərməkdə davam edir.

''Football-plus.az'' xəbər verir ki, ''Əl-Şabab''ın Fatih Terimlə anlaşmasının ardından indi də bu ölkənin başqa klubu İsmayıl Kartala təklif irəli sürüb. Söhbət ''Əl-Taavun''dan gedir. Kartal bilindiyi kimi ötən mövsüm ''Fənərbaxça''nın başında inanılmaz işlər görmüşdü.

Kartalın dönəmində ''Fənər'' bir sıra rekordları qurmasına və 99 xal toplamasına baxmayaraq çempion ola bilməmişdi. Təcrübəli mütəxəssis ''Fənər''dən ayrıldıqdan bu yana bir sıra təkliflər alsa da, hələ ki, dincəlməyə üstünlük verir. Türkiyə mətbuatının yazdığına görə ''Əl-Taavun'' Kartalı dilə tutmağa çalışır. Məşqçi düşünmək üçün vaxt istəyib. Təklifin maddi tərəfləri barədə məlumat verilmir. 1959-cu ildə yaradılan ''Əl-Taavun'' indiyə qədər heç vaxt ölkə çempionu ola bilməyib. Amma komanda 2019-da ölkə kuboku və superkubokunu qazanıb.

Hazırda 9-cu pillədə qərarlaşan ''Əl-Taavun''u mövsümün əvvəlindən bəri Rodolfo Arruabarrena çalışdırır. Amma rəhbərlik argentinalı mütəxəssisdən narazıdı və o, hər an işini itirə bilər. Kartal təklifi qəbul etsə, fevralın 22-də Terimə rəqib ola bilər. Həmin tarixdə ''Əl-Taavun'' ''Əl-Şabab''ı qəbul edəcək.

ƏLİ