Ölkəmizi xaricdə təmsil edən az sayda futbolçudan biri də Vüsal İsgəndərlidi.

Onun legioner həyatı bu mövsüm fərqli axarla davam edir. İlin lap əvvəlində Albaniyadan söz-söhbətli formada “Boluspor”a transfer olunan futbolçu Fernando Santuş gələndən sonra millidəki yerini də itirdi.

“Football-plus.az” Vüsalla bu və başqa mövzular ətrafında söhbətləşib.

- Hazırda Boluda düşərgədəsənmi, qış hazırlığı necə gedir?
- Bəli, düşərgədəyəm. Qış hazırlığı artıq başlayıb. Demək olar, ağır məşqlər yoxdu. Çünki növbəti oyunumuza 5-6 gün qalıb. Ona görə də yükləmələr olmur.

- Təkliflər aldığın deyilir. Türkiyədan, Albaniyadan, yoxsa başqa ölkədəndi? Ümumiyyətlə, karyeranı Türkiyədə davam etdirmək fikrindəsənmi?
- Təklif var idi. Əsasən yayda daha çox təklif oldu. Həm milli komandadan gəldiyimə, həm də sabit oynadığıma görə dəvətlər aldım. Amma yəqin mövsümün sonuna kimi burdayam. Karyeramı Türkiyədə davam etdirmək istəyirəm.

- Azərbaycandan da səninlə maraqlanan klubların olduğu deyilir. Konkret təklif almısan, yoxsa vətənə qayıtmaq barədə düşünmürsən?
- Düzdü, ölkədən maraqlanan klublar oldu. Amma rəsmi təklif gəlmədi. Burda müqaviləmin müddəti davam etdiyi üçün heç kimdən rəsmi təklif də almadım.

- İlin əvvəlində Albaniyadan Türkiyəyə köçdün. Bu məqam, həmçinin son vaxtlar daha az şans qazanmağın karyerana necə təsir etdi?
- Düzü, ilin əvvəlində Türkiyəyə fərqli düşüncələrlə gəlmişdim. Fərqli niyyətlər, məqsədlərim var idi. Mediada yaxın dost-tanışım var, onlar da müsahibələrimdə seçimimin səhv olduğunu deyirdilər. Özümə görə qurduğum planlar vardı. O planlar oldumu? Olmadı. Ola bilər ki, seçimimdə yanıldım. Bu da bir təcrübə idi. Mənə görə itirdiyim yox, qazandığım təcrübə var. Amma heç nə üçün gec deyil. Yenə də uğurlu ola biləcəyimə həddən çox inanıram.

- Milli komandaya dəvət almadığını da nəzərə alsaq, ili sənin üçün uğursuz saymaq olarmı?
- Dediyim kimi, mənə görə itirilən yox, qazanılan təcrübə var. Həmişə az və ya çox oynamağımdan asılı olmayaraq, əlimdən gələni edib istədiyim məqsədə çatmağa çalışmışam. Hazırkı vəziyyətdə milli komandaya dəvət almamağım çox normaldı, çünki klubumda oynamıram. Belə şəraitdə dəvət gözləmək düzgün olmaz. İnşallah, əlimdən gələni edib oynayacam. Ondan sonra dəvət almağım daha məqsədəuyğun olar.

- “Futbol+”in ilin futbolçusu seçimində Mahir Emreli, Elvin Cəfərquliyev və Toral Bayramov favorit idi. Nəticədə Toral ilin futbolçusu seçildi. Sən kimə səs verərdin?
- Həm Torala, həm də Elvinə. Hər ikisinin bu mövsüm etdikləri buna layiq olduqlarını göstərdi. Sadəcə, bu iki oyunçunu layiq görərdim. Toral seçilibsə, onu da burdan təbrik edirəm. Haqq edirdi.

RÖYANƏ OĞUZ