Bilindiyi kimi, Vüsal İsgəndərli yanvarın 3-də Albaniya "Eqnatiya"sından "Boluspor"a keçmək qərarı verdi. 28 yaşlı hücumçu ilə ilyarımlıq müqavilə imzalanıb.
Albaniyada çempionluğa iddialı klubdan Türkiyənin 1-ci liqasının ortababına keçid Vüsalın karyerası baxımından geri addım deyilmi? Belə birisi yığmaya çağrılacağına ümid edə bilərmi? Bu sualları menecerlərdən Tural Əsgərova ünvanladıq:
“Müəyyən addımlar var ki, adam futbolçu karyerası bir kənara, maliyyə vəziyyətini düşünməlidi. Aydın məsələdi ki, Vüsalın "Boluspor"da maaşı daha yüksəkdi. Məncə, Albaniya superliqası Türkiyənin 1-ci liqasından səviyyəcə daha aşağıdı. Tək Vüsal yox, bir çox futbolçu ordan Türkiyənin 1-ci liqasına qaça-qaça gedər. "Boluspor" çempionluğa iddialı olsaydı, heç Vüsalla maraqlanmazdı. Onlarda 1-ci liqadan elitaya yüksəlmək istəyənlərin büdcəsi bizim "Qarabağ"ın büdcəsindən belə yüksəkdi. Bu, sadəcə, bir transferdi. Albaniyadan Türkiyəyə keçidin ciddi təhlil edilməsinin tərəfdarı deyiləm. Normal bir transferdi. Türkiyədə oynamaq çətindi. Bunun bir çox səbəbi var. Məncə, Vüsala "Boluspor"da çətin olacaq. Uğurlar arzulayıram yenə də".
Tural bəy De Byazinin Vüsalı milliyə çağırmaması haqda da danışdı:
“Vüsal harda oynamasından aslı olmayaraq, Canni de Byazi üçün maraqlı futbolçu deyildi. Burda söhbət onun harda oynamasından yox, necə oynamasından gedir. Hətta Albaniyada oynayıb 20 qol vursan, hamı üçün maraqlı olarsan, amma Albaniyada 3-4 qol vursan, əlbəttə, maraqlı olmayacaqsan".
GÜNAY SÜLEYMANOVA