Poqbanın oğurlanmasıyla bağlı altı şəxs mühakimə olundu - onların arasında futbolçunun böyük qardaşı da var
Dekabrın 19-da Paris Cinayət Məhkəməsində Pol Poqbanın 2022-ci ilin martında oğurlanması ilə bağlı keçirilən proses başa çatıb. Dekabrın əvvəlində, 7 gün ərzində məhkəmə dinləmələri keçirilib, ardından ittiham olunan 6 nəfərə hökm oxunub. Onların arasında futbolçunun böyük qardaşı Matias da var.
Xatırladaq ki, Pol 2022-nin martında Fransa yığmasının düşərgəsinə yollanmaq ərəfəsində Parisətrafı şəhərciyə yollanmışdı ki, yaxınlarına baş çəksin. Şəhərciyə çatan kimi onu oğurlamışdılar – ünlü yarımmüdafiəçi gözünü açanda özünü boş otaqda görmüşdü. Orda ona tapança ilə hədə-qorxu gələn şəxslər 13 milyon avro tələb etmişdilər. Pol cinayətkarlardan birinin karyerasını aşağı liqalarda keçirən qardaşı Matias olduğunu bilmişdi. Böyük qardaş Rotterdam “Sparta”sı, “Peskara”, “Rekshem”, “Kryu Aleksandru” və başqa tanınmayan klublarda oynayıb.
Yarımmüdafiəçini azad etdilər, o isə polisə üz tutdu. Fransa mediası xəbər verir ki, futbolçu uzun müddət uşaqlıq dostlarına maliyyə yardımı edib, lakin kredit kartının oğurlanmasına etiraz əlaməti kimi yardımı dayandırıb. Elə həmin ilin sentyabrında Matias və əlaltıları həbs olundu, ancaq bir müddət sonra Polla ünsiyyətlərinə və Fransadan çıxışa qadağa qoyulmaqla onları azad etdilər.
Ümumilikdə işdə 6 nəfərin adı keçirdi, onların hər birinə həbs cəzası kəsilib. Matias ən yüngül cəza alıb – ikisi şərti olmaqla üç il, həmçinin 20 min avro cərimə. Məhkəmə iclaslarının birində prokuror izah edib ki, Matias artıq cinayət planlaşdırılandan sonra bandaya qoşulub, bu üzdən cəzası yüngül olmalıdı. Bununla belə, böyük Poqbanın vəkili Mbeko Tabula yenə də narazı qalıb. O, müştərisinin günahsız olduğunu iddia edir və apellyasiya şikayəti yazacaq:
“Bu, gözləntilərimizə uyğun olmayan hədsiz sərt cəzadı. Matiasla danışacam, ancaq düşünürəm ki, apellyasiya şikayəti verməli olacağıq. By qərar reallıqda başverənlərə qətiyyən uyğun gəlmir. Matiaş şokdadı. O lap əvvəldən günahsız olduğunu bildirir. Dediyinə görə, onu manipulyasiya, məcbur ediblər, təzyiq göstəriblər. Yoxsa heç vaxt qardaşına münasibətdə pis davranmazdı. Məhkəmə onun asılılığını nəzərə almayıb, müştərim bəzi hərəkətləri etməyə məcbur olub”.
Banda üzvlərindən Ruşdeyn K. ən ağır cəzaya məruz qalıb – 8 il həbs. Qalan cinayətkarlar müəyyən hissəsi şərti olmaqla 4-5 illiyə həbsə məhkum olunublar. Ruşdeynin vəkini Dafne Pulyezi prosesin axarına qəzəbli reaksiya verib. Onu qəzəbləndirən əsas məqamlar Pol Poqbanın məhkəmədə iştirak etməməsi, eləcə də məhz futbolçunun adına görə müştərisinin daha ağır cəza almasıdı:
“Polun yoxluğuna görə çox təəssüflənirəm. Ona ünvanlanası çoxlu sualımız var. Pol bu işdə qurbandı – buna şübhə etmirik. Ancaq o, ifadələrində heç də səmimi deyil. Və onun ifadələri sözlərindən başqa heç bir ittihamın olmadığı bu işin axarında böyük rol oynadı. Məhz Pol amili üzündən bu işə başqa işlər kimi yanaşılmadı. Prosesdə iki prokuror iştirak etdi, adətən, belə işlərdə bir prokuror da kifayətdi. Kütləvi informasiya vasitələri hər şeyi işıqlandırdı. Bu üzdən düşünürəm ki, Poqbanın məşhurluğuna görə hökmlər bir qədər sərt oldu. Bəlkə də Polun sözləri başqa hər şeydən daha vacib sayıldı”.
Digər xəbərlər
