Artıq bir neçə gündü Rio de Janeyronun küçə və meydanları, belə ifadə etsək, ağ və qara rənglərə boyanıb. “Botafoqo”nun azarkeşləri uzun illərdən sonra könül verdikləri komandanın çempionluğunu böyük sevinclə bayram edirlər. Zarafat deyil, onlar belə sevinci sonuncu dəfə 29 il əvvəl yaşamışdılar...

Braziliya çempionatında 36-cı turdan sonra çempionluq uğrunda mübarizənin yekununa böyük ölçüdə aydınlıq gəlmişdi. Finişə iki tur qalmış şərikli lider olan “Palmeyras” ilə “Botafoqo” arasındakı rəqabətdə sonuncular əhəmiyyətli üstünlük qazanmışdılar: “ağ-qaralar” titul uğrunda yeganə rəqibini səfərdə 3:1 hesabıyla məğlub etməklə 3 xal önə keçmişdilər. Deməli, sonuncu turda “Botafoqo”ya “San Paulu” ilə ev oyununda bir xal da kifayət edəcəkdi. Rəqib mövsümboyu ən iddialı komandaların sırasında olsa da, finiş ərəfəsində çox sayda xal itirdiyi üçün “mükafatçılar zonası”ndan gözünü çəkmişdi.

Əsas səbəb san paululuların zədə sindromuna tutulması ilə bağlı idi. Onlar “Botafoqo”ya qarşı son oyuna da ciddi itkilərlə çıxdılar. Meydan sahiblərinin üstünlüyü ilə keçən matçın 37-ci dəqiqəsində Savarino yerli publikanı ayağa qaldırdı. Artur Jorjenin komandası bununla kifayətlənməyib təşəbbüsü əldə saxlamağa çalışırdı. Ancaq fasilədən sonra meydandakı mübarizəyə bir qədər tarazlıq gəldi və Villiam 63-cü dəqiqədə hesabı bərabərləşdirdi. Bu hesab ev sahiblərini qane etsə də, rio de janeyrolular qalan vaxtda azarkeşlərini nigarançılıqda saxlamaq istəmirdilər. Ona görə də üstünlüyü yenidən ələ alan “Botafoqo” rəqibin hesabda önə keçməsinə imkan verməməyə çalışırdı. Nəhayət, Qreqore əsas vaxta əlavə olunan dəqiqələrdə çempionun kimliyi ilə bağlı suala yekun cavab verdi.

Onun vurduğu qələbə qolu “ağ-qaralar”ın 29 illik titul həsrətinin sona çatdığını rəsmiləşdirdi! “Botafoqo” tarixində 3-cü dəfə Braziliya çempionu oldu. Bundan əvvəl 1968 və 1995-ci illərdə ölkənin ən güclüsü olan komanda bir neçə gün əvvəl tarxində ilk dəfə Libertadores Kubokunu (LK) qazanmışdı. Bu uğurların əsas memarı olan Jorjenin Rio de Janeyro klubuna aprel ayında təyin olunduğunu və 52 yaşlı portuqaliyalı mütəxəssisin əvvəlki iki ildə “Braqa”nı çalışdırdığını da xatırladaq.
“Botafoqo” son oyunda uduzacağı halda belə azarkeşləri çempionluq nəğməsi oxuyacaqdılar. Ona görə ki, “Palmeyras” mövsümü məğlubiyyətlə başa vurdu. “Fluminense”yə öz meydanında minimal hesabla uduzan san paululular son iki mövsümün çempionu kimi statusunu əldən verdilər. Hələ bir neçə gün əvvəl əsas rəqibi ilə evdə oynadığı üçün titulu qorumaq üçün əla şansa malik olan Abel Ferreyranın komandası gümüş mükafatla kifayətləndi.

Sonuncu tur ərəfəsində “Flamenqo” bürünc medallara sahib çıxmışdı. Komandaya Titenin sentyabrda istefaya göndərilməsindən sonra başçılıq edən Filipe Luisin debütünün uğurlu alındığını demək olar. Rio de janeyrolular 39 yaşlı baş məşqçinin rəhbərliyi altında ölkə kubokunu qazandılar.

Sonuncu turda LK-nın bütün iştirakçıları məlum oldu. Qeyd edək ki, Cənubi Amerikanın ən nüfuzlu klub turnirinin qrup mərhələsinə ilk 6 yerin sahibi birbaşa vəsiqə qazanır. Başqa sözlə, bu hüquqa “Botafoqo”, “Palmeyras”, “Flamenqo”, “Fortaleza”, “İnternasyonal” və “San Paulu” yiyələndi. Mövsümü 7-8-ci yerlərdə başa vuran “Korintians” ilə “Bayya” LK-nın təsnifat mərhələsində oynayacaqlar. Yekun cədvəldə 9-14-cü yerləri tutan 6 komanda - “Kruzeyro”, “Vasku da Qama”, “Vitoriya”, “Atletiko Mineyro”, “Fluminense” və “Qremio” isə Braziliyanı Sudamerikana Kubokunun növbəti mövsümündə təmsil etmək hüququ qazandı.

Həlledici turda A seriyasında yerini itirən sonuncu komanda da müəyyənləşdi. “Atletiko Qoyaniense”, “Kuyaba” və “Krisiuma”dan sonra “Atletiko Paranaense” də növbəti mövsümə B seriyasında başlayacaq.

38-ci tur
Botafoqo RJ - San Paulu 2:1
Savarino, 37. Qreqore, 90+2 - Villiam, 63.
Palmeyras - Fluminense 0:1
Serna, 37.
Flamenqo - Vitoriya 2:2
Qabriel Barboza, 59. Ayrton Lukas, 79 – Alerrandro, 16. Janderson, 74.
Fortaleza - İnternasyonal 3:0
Moyses, 7; 20. Tinqa, 53.
Qremio - Korintians 0:3
Yuri Alberto, 45+3-p. Çarles, 88. Depay, 90+3.
Atletiko Mineyro - Atletiko Paranaense 1:0
Rubens, 73.
Bayya - Atletiko Qoyaniense 2:0
Tasiano, 41. L.Rodriges, 58-p.
Braqantino - Krisiuma 5:1
Juninyo Kapişaba, 13. Vinisius, 30. Eduardo Saşa, 55. Moskera, 70. Con Con, 81 – Rodriqo, 39.
Kuyaba - Vasku da Qama 1:2
Derik Laserda, 19 - Veqetti, 17; 43.
Juventude - Kruzeyro 0:1
Tevis, 30.

Yekun cədvəl
1. Botafoqo RJ 38 23 10 5 59-29 79
2. Palmeyras 38 22 7 9 60-33 73
3. Flamenqo 38 20 10 8 61-42 70
4. Fortaleza 38 19 11 8 53-39 68
5. İnternasyonal 38 18 11 9 53-36 65
6. San Paulu 38 17 8 13 53-43 59
7. Korintians 38 15 11 12 54-45 56
8. Bayya 38 15 8 15 49-49 53
9. Kruzeyro 38 14 10 14 43-41 52
10. Vasku da Qama 38 14 8 16 43-56 50
11. Vitoriya 38 13 8 17 45-52 47
12. Atletiko Mineyro 38 11 14 13 47-54 47
13. Fluminense 38 12 10 16 33-39 46
14. Qremio 38 12 9 17 44-50 45
15. Juventude 38 11 12 15 48-59 45
16. Braqantino 38 10 14 14 44-48 44
17. Atletiko Paranaense 38 11 9 18 40-46 42
18. Krisiuma 38 9 11 18 42-61 38
19. Atletiko Qoyaniense 38 7 9 22 29-58 30
20. Kuyaba 38 6 12 20 29-49 30

Bombardirlər: Alerrandro (Vitoriya), Yuri Alberto (Korintians) - 15, Estevao (Palmeyras) - 13, Veqetti (Vasku da Qama) – 12, Pedro (Flamenqo), Rafael Veyqa (Palmeyras), Lusiano (San Paulu), Uesli (İnternasyonal) - 11.