Özbək “Fənərbaxça”nı müflis olmuş tacirə bənzətdi
Türkiyənin iki nəhəngi - əzəli rəqiblər “Qalatasaray”la “Fənərbaxça” arasındakı münasibətlər yenə gərginləşib. Səbəb isə “Fənərbaxça”nın çempionluqlarının sayının artırılması ilə bağlı iddiadı.
"Football-plus.az" xəbər verir kii, İstanbul nəhəngi iki ildən artıqdı Türkiyə Futbol Federasiyasına (TFF) müraciət ünvanlayıb.
“Fənər” Türkiyə çempionatının rəsmi yaranma tarixi sayılan 1959-cu ildən öncə “Milli Liqa” adı ilə keçirilən turnirlərdə 9 çempionluğunun olduğunu iddia edir və uyğun olaraq, çempionluq sayının 19-dan 28-ə qaldırılması istəyir. TFF isə bu yaxınlarda “sarı-lacivərdlilər”in tələbinin yoxlanılması üçün xüsusi komissiya qurulacağını açıqladı. “Fənər”in çempionluq sayının 28-ə qaldırılması həm də komandaya formanın üzərinə 5 ulduz yerləşdirməyə imkan verəcək. Çünki Türkiyədə hər 5 çempionluğa 1 ulduz verilir. Hərçənd “Fənər” rəhbərliyi ötən mövsümün sonundan artıq 5 ulduzlu fornalardan istifadə etməyə başlayıb və yeni mövsümdə də bunu davam etdirmək niyyətindədi. Ötən mövsüm ölkə kubokunun finalından sonra “Fənər”lilərin əynində 5 ulduzlu forma olması diqqəti çəkmişdi. Bütün bunlar, təbii ki, “Qalatasaray” camiəsini qıcıqlandırır.
Başqan Dursun Özbək srağagün jurnalistlərlə görüşdə bunları dedi:
“1959-dan öncəki çempionluqların yoxlanılması üçün qurulmuş komissiya barədə əlavə sözə ehtiyac yoxdu. Bu hadisə mənə müflis olmuş tacir misalını xatırladır. Müflis olmuş tacir köhnə dəftərləri açıb vərəqləməyə və ona köhnə borcların olub-olmadığını yoxlamağa başlayır. Ortada konkret və müzakirəyə ehtiyacı olmayan bur durum var. Türkiyə çempionatı ev-səfər prinsipi ilə məhz 1959-cu ildən etibarən keçirilməyə başlanıb. 2001/02 mövsümündə isə hər 5 çempionluq üçün formaya 1 ulduz əlavə edilməsi ilə bağlı qərar verildi. Bu qərarı biz yox, federasiya verdi. “Beşiktaş”ın 1959-dan öncəki 2 çempionluqla bağlı müraciəti olmuşdu. Onlara 2 çempionluq haqqı verildi. Artıq bu söhbət bitdi. 20 ildən sonra bəzilərinin ağlına köhnə dəftərləri açmaq ideyası gəldi. 20 il idi hardaydız? Heç kimin qərarları dəyişməyə haqqı yoxdu. Federasiya komissiya qurmaqla özü öz qərarlarını şübhə altına salmış olur. Məsələni Appelyasiya Komitəsinə qədər daşıyacağıq. Təəssüf ki, bəziləri futbolu meydandan kənara çıxarmaqda çox mahirdi. Bizim gündəmimizə baxın! Türkiyə futboluna zərrəcə faydası olmayan bu məsələni günlərdi müzakirə etmək məcburiyyətindəyik. Maddi problemləri, klublarımızın Avropada zəif çıxışını müzakirə etmək əvəzinə qarşıdakı 3-5 ildə yeni və lazımsız mövzünü müzakirə edəcəyik”.
“Fənərbaxça”nın Dursun Özbəyin bu sözlərinə cavabı gecikmədi. Klubun sosial şəbəkədəki səhifələrində yenə ənəvi bəyanat yerləşdirildi: “Sizi və ya göndərəcəyiniz adamları istədiyiniz yerdə, istədiyiniz zaman həqiqətləri müzakirə etməyə dəvət edirik”. “Fənər” son illərdə dəfələrlə “Qalatasaray”a məhz belə cavab verib. Hətta başqan Əli Koç 1959-dan əvvəlki çempionluqları müzakirə etmək və kimin haqlı olduğunu üzə çıxarmaq üçün Dursun Özbəklə “Qalatasaray TV”nin canlı yayınına çıxmağa da hazır olduğunu dəfələrlə bildirib.
Digər xəbərlər
