Sventek PR menecerini qovdu
Polşalı tennisçi İqa Sventek dopinqlə bağlı qalmaqal fonunda PR menecerini dəyişib.
Son 4 ildə ünlü tennisçi ilə əməkdaşlıq edən Paula Volitskayanın yerini Darya Sulqostovska tutub. Volitskaya “Punto de Break” nəşrinə ayrılıqla bağlı danışıb:
“İqa ilə 4 il sürən əməkdaşlıq dövrü mənim üçün unudulmaz macəra və unikal peşəkar çağırış oldu. İqaya və bütün komanda üzvlərinə növbəti təşəbbüslərdə uğurlar arzulayıram. Mən isə ictimaiyyətlə əlaqələr yox, başqa bir sahədə çalışmaq niyyətindəyəm”.
Xatırladaq ki, noyabrın 28-də Sventekin dopinq-testinin hələ sentyabrın 12-də müsbət nəticə verməsi və bu üzdən bir ay kortdan kənarda qalması ilə bağlı xəbər yayılıb. Onun orqanizmində trimetazidin aşkarlanıb.
Rəsmi versiyaya görə, yasaq preparatın mənbəyi çirkli dərman olub. Araşdırma zamanı tennisçinin bu hərəkəti qəsdən etmədiyi və səhlənkarlığa yol vermədiyi müəyyənləşib.
Sventekin bu il 4 WTA turnirinin, eləcə də “Rolan Qarros”un qalibi olduğunu, ümumilikdə 61 qələbə qazandığını, 9 görüşdə məğlub olduğunu da xatırladaq.
Digər xəbərlər
