İtaliya çempionatının ötən mövsümünün iki laureatı müəyyənləşib. Eyni klubun üzvləri müxtəlif nominasiyaların qalibləri seçiliblər.

Mövsümün ən yaxşı futbolçusu üçün nəzərdə tutulan mükafata “İnter”in formasını geyən Lautaro Martines layiq görülüb. 27 yaşlı argentinalı hücumçu 2023/24 mövsümündə A seriyasında 33 matça çıxıb və 24 qol vurub. Lautaro “İnter”də 2018-ci ilin yayından oynayır.

Ötən mövsümün ən yaxşı baş məşqçisi adına isə “İnter”i çalışdıran Simone İnzaqi layiq görülüb. Qeyd edək ki, mükafata “Atalanta”nın baş məşqçisi Can Pyero Qasperini ilə “Bolonya”nın sabiq, “Yuventus”un hazırkı çalışdırıcısı Tyaqo Motta da namizəd idilər. “İnter”i A seriyasında çempionluğa daşıması İnzaqiyə daha çox səs qazandırıb.