“Yuta”nın hücumçusu Cek Makbeynin sosial şəbəkədəki səhifəsində azarkeşlərin qəzəbli şərhləri yer alıb.

Bütün bunların səbəbi isə onun “Vaşinqton”un rusiyalı hücumçusu Aleksandr Oveçkini zədələməsi ilə bağlıdı. Bəziləri əmindi ki, kanadalı belə hərəkəti bilərəkdən edib. Makbeyn sosial şəbəkədə çox sərt şəkildə qınanır. Ancaq məsələ təhqirlərlə də bitmir. İş o yerə çatıb ki, 24 yaşlı forvarda fiziki cəhətdən məhv edəcəkləri ilə bağlı təhdid yağdırırlar:

* “Öz skeytbortunun üzərinə başı üstündə tullanmaq ideyasına necə baxırsan?”
* “Bəxtin onda gətirib ki, Todd Bertuççi bu komandada yoxdu. Onda xərəkdə olardın”
* “Bütün liqa sənin ovuna çıxıb, qardaş”
* “Növbəti oyuna qədər Marşamın səni xərəyə sərəcəyinə ümid edirəm”
* “Əmin ol, biz səni tapacağıq, hər şeyə görə cavab verəcəksən”.

Düzdü, həm Qərbdə, həm də Rusiyada Makbeynin hərəkətində heç bir qəsd görməyənlərin sayı daha çoxdu.

Noyabrın 22-də - “Vaşinqton” “Kolorado” ilə qarşılaşanda paytaxt klubunun düşərgəsindən üç gün əvvəl “Yuta” ilə oyunda zədələnən Aleksandrın sağlıq durumu haqda bəd xəbər gəldi. Əvvəlcə belə xəbər yayıldı ki, Oveçkin yaxın həftələrdə buz üzərinə qayıdacaq. Ancaq heç də belə deyilmiş.

Sonradan aydın oldu ki, 39 yaşlı forvard sol ayaq çəpərini zədələyib və 4-6 həftəliyə sıradan çıxıb. Rusiyalı ulduzun əla forma yığdığını nəzərə alsaq, bu zədə heç yerinə düşmədi. Oveçkin zədə ərəfəsində keçirdiyi iki oyunda 5 qol vurmuşdu.

Daha bir maraqlı məqam odu ki, Oveçkin indiyə qədər MHL-də keçirdiyi 20 mövsüm ərzində heç vaxt belə uzun müddətə sıradan çıxmamışdı, yəni 6 və daha artıq oyun buraxmamışdı.

Zədəyə baxmayaraq, Aleksandrın elə bu mövsüm Ueyn Qretskinin əbədi snayperlik rekordunu qırmaq vəzifəsinin öhdəsindən gəlmək üçün yaxşı şansı var. Əfsanəfi kanadalı MHL karyerasında 894 qol vurub, rusiyalı ulduzun hesabında 868 qol vurub, daha 26 dəfə fərqlənməlidi.

Aleksandrın Milad bayramından sonra və ya bir qədər tez buz üzərinə qayıtması gözlənilir. Bərpa prosesi plan üzrə getsə, elə bu mövsüm onun sərəncamında müntəzəm çempionatın yarıdan çox oyunu olacaq.