Əvvəlki turda qrup liderliyini təmin edən Portuqaliya, gözlənildiyi kimi, meydana eksperimental heyətlə çıxmışdı. Roberto Martinesin komandanın bir çox liderlərini Splitə aparmayacağını xəbər vermişdik. Kriştiano Ronaldo, Bernardo Silva və Netonun yoxluğunda “Benfika”nın 22 yaşlı müdafiəçisi Araujo yığmada debüt etdi.

Bu oyun Portuqaliya üçün heç bir önəm daşımasa da, Xorvatiyaya xal lazım idi. Ya da “damalılar” Polşanın qələbəsi üçün dua etməliydi. Xorvatiya fasiləyə qədər yalnız daha çox qol vurduğuna görə 2-ci pilləni qorudu. Özü də hər iki matçın axarı Daliçin komandasını qane etməyən şəkildə gedirdi. Birincisi, 33-cü dəqiqədə Feliş xorvatların qapısına yol tapdı. İkincisi, hələ oktyabrda sonuncu yerdə qərarlaşan Şotlandiya paralel keçən oyunun əvvəlində Polşanı məyus etməklə 2-ci pilləyə yüksəldi. Makqinn ardıcıl 2-ci oyunda fərqləndi.
Xorvatlardan Matanoviçlə Kramariçin fərqlənmək şansı olsa da, fasiləyə qədər hesab dəyişmədi. Hər halda, elə ilk yarının sonunda vəziyyət balkanlılar üçün daha faciəvi ola bilərdi. Onların xoşbəxtliyindən şotlandların liderlərindən Maktominey Varşavada topu tirə vurdu, Portuqaliyanın heyətində isə Leao fərqi artırmaq imkanını qaçırdı.

Fasilədən sonra vəziyyət dəyişdi. Polşa Pyontkovskinin uzaq “9-luğ”a dəqiq zərbəsi sayəsində hesabı bərabərləşdirdi. Tezliklə xorvatlar da eyni yolda addımladı. Yakiçin ötürməsindən sonra iti bucaq altında olan Qvardiol qapıya dəqiq zərbə vurdu. Bu, onun DÇ-2022-də bürünc medal qazanılandan bəri vurduğu ilk qoldu. Sonda sanki komandalar heç-heçəyə razı idi. Axı Portuqaliyanın irəli atılması mənasız idi, bu nəticə paralel keçən oyunun hansı hesabla bitməsindən asılı olmayaraq, Xorvatiyanı da razı salırdı. Beləcə Daliçin komandası 2-ci oldu.

Digər oyunda sonluq maraqlı alındı. Levandovskinin yoxluğunda hücum potensialı xeyli azalan Polşa heç-heçəni də qoruya bilmədi və B liqasına yollandı. Hərçənd polşalıların halına acımaq əvəzinə üç məğlubiyyətlə başlayıb, sonradan vəziyyəti düzəldən Şotlandiyaya heyranlıq duymaq daha yaxşı olardı. Robertsonun 3-cü uzatma dəqiqəsində vurduğu gözəl baş zərbəsi Şotlandiyaya gələn ilin martında A liqasında yerini qorumaq üçün pley-offa qatılmaq imkanı yaratdı.

A liqası, 1-ci qrup
Xorvatiya – Portuqaliya 1:1 (0:1)
Xorvatiya: Livakoviç, Qvardiol, Çaleta-Sar, Şutalo, Sosa (Yakiç, 46), Kovaçiç (Paşaliç, 46), Modriç (Moro, 78), Perişiç (L.Suçiç, 58), Baturina, Matanoviç (Budimir, 63), Kramariç.
Portuqaliya: Sa, Veyqa, Araujo (Calo, 63), Semedo, Mendeş (Dalot, 80), Vitinya, Neveş, Otavio (F.Silva, 71), Kanselo, Leao (F.Konseysao, 71), Feliş.
Qollar: Feliş, 33 (0:1). Qvardiol, 66 (1:1).
Vərəqələr: Veyqa, 90. F.Silva, 90+5 – sarı.
Hakim: Davide Massa (İtaliya).
18 noyabr. Split. 33386 tamaşaçı.

Polşa – Şotlandiya 1:2 (0:1)
Polşa: Skorupski, Bulka, Kivyor, Valyukeviç, Pyontkovski, Zalevski, Zyelinski, Moder (Sliş, 46), Şimanski, Kaminski (Puxaç, 63), Sviderski (Urbanski, 75), Buksa.
Şotlandiya: Qordon, Robertson, Henli, Suttar, Rolston (Delvin, 76), Maklin, Gilmor (Armstronq, 87), Makqinn, Maktominey (Qold, 76), Doak (Şenklend, 66), Dayks (Kristi, 66).
Qollar: Makqinn, 3 (0:1). Pyontkovski, 59 (1:1). Robertson, 90+2 (1:2).
Vərəqələr: Maklin, 31. Kristi, 70. Zyelinski, 79. Buksa, 90+3. Makqinn, 90+5 – sarı.
Hakim: Kristian Dingert (Almaniya).
18 noyabr. Varşava. 55433 tamaşaçı.

1. Portuqaliya 6 4 2 0 13-5 14
2. Xorvatiya 6 2 2 2 8-8 8
3. Şotlandiya 6 2 1 3 7-8 7
4. Polşa 6 1 1 4 9-16 4

Oyundan sonra
Zlatko Daliç, Xorvatiya yığmasının baş məşqçisi: