Ronaldo 910-a çatdı, Xorvatiya “qırmızı”nın güdazına getdi - ŞƏRH
Polşa yığması Portudakı oyuna Levandovskisiz, amma cəsarətli başladı.
Təsadüfi deyil ki, ilk yarıda bütün sarı vərəqələr meydan sahiblərinə göstərildi. Fernandeş məhz bu səbəbdən sonuncu turu buraxacaq. Ən maraqlı məqam isə Ronaldonun fasilə ərəfəsindəki demarşı oldu. Topu qapıya vurmaq istərkən müdafiəçi ilə toqquşan ulduz elə emosional şəkildə penalti tələb etdi ki, hakim dərhal sarı vərəqə çıxardı.
Hesab edək ki, bu məqam sözün yaxşı mənasında Portuqaliyanı qıcıqlandırdı və 2-ci hissədə oyunun axarı kəskin şəkildə dəyişdi. Meydan sahiblərinin təzyiqi artdı. Mendeşin gözəl ötürməsindən sonra hesabı açan Leao polşalıların müqavimətini qırdı. Bundan sonra meydanda yalnız bir komanda var idi. Fernandeşin uzaq məsafədən vurduğu qolu izləməyə dəyərdi. Hələ qocalmaq bilməyən Ronaldonu demirik. O, əvvəlcə karyerasında 169-cu dəfə penaltidən fərqləndi (200 dəfə “nöqtə”yə yaxınlaşıb), ardından Netonu zərbə mövqeyinə çıxardı, 87-ci dəqiqədə isə “qayçı” zərbəsi ilə hesabı 4:0 etdi. Möcüzədi, bütün bunları 39 yaş 9 aylığında bacarır! Bu qələbə həm də Portuqaliyanın qrup birincisi olmasını rəsmiləşdirdi.
Qlazqoda keçirilən Şotlandiya – Xorvatiya oyununun nəticəsinə Peter Suçiçin ilk yarının sonunda meydandan qovulması ciddi təsir göstərdi. Hərçənd onun qayda pozuntusu 2-ci sarı vərəqə göstərilməsinə əsas vermirdi. Xorvatiya hətta azlıqda da oyunun axarını öz xeyrinə dəyişə bilərdi. Ancaq Modriçdən gözəl ötürmə alan Paşaliç əla imkanı boşa verdi. Sona az qalmış isə Makqinn şotlandiyalılara qələbə qazandıran qolu vurdu. Xorvatların hesabı bərabərləşdirmək üçün nə gücü, nə də vaxtı var idi.
A liqası, 1-ci qrup
5-ci tur
Portuqaliya – Polşa 5:1 (0:0)
Portuqaliya: D.Koşta, Mendeş (Tavareş, 88), Veyqa, A.Silva, Dalot, Fernandeş, Neveş (Vitinya, 46), B.Silva (S.Koşta, 76), Leao (Trinkan, 83), K.Ronaldo, Neto (Feliş, 83).
Polşa: Bulka, Kivyor, Bednarek (Valyukeviç, 46), Pyontkovski, Zalevski, Zyelinski, Romançuk, Boquş (Marçuk, 46), Bereşinski (Kaminski, 32), Urbanski (Buksa, 72), Pyontek (Kozubal, 80).
Qollar: Leao, 59 (1:0). K.Ronaldo, 72-p. (2:0). Fernandeş, 80 (3:0). Neto, 83 (4:0). K.Ronaldo, 87 (5:0). Marçuk, 88 (5:1).
Vərəqələr: Neveş, 25. Fernandeş, 25. K.Ronaldo, 45+2. Bulka, 56. Tavareş, 90+2 – sarı.
Hakim: Donatas Rumşas (Litva).
15 noyabr. Portu. 47239 tamaşaçı.
Şotlandiya – Xorvatiya 1:0 (0:0)
Şotlandiya: Qordon, Robertson, Henli (Makkenna, 46), Suttar, Rolston, Maklin (Makqinn, 67), Gilmor, Kristi (Qold, 66), Maktominey, Doak (Armstronq, 90+2), Konuey (Dayks, 67).
Xorvatiya: Kotarski, Qvardiol, Çaleta-Sar, Şutalo, Yakiç (Pyatsa, 82), Kovaçiç, Modriç, Baturina (Vlaşiç, 75), P.Suçiç, L.Suçiç (Perişiç, 65), Kramariç (Paşaliç, 65).
Qol: Makqinn, 86.
Vərəqələr: P.Suçiç, 30. Çaleta-Sar, 41. Kramariç, 44 – sarı. P.Suçiç, 44 –qırmızı (ikinci sarı).
Hakim: Orel Qrinfeld (İsrail).
15 noyabr. Qlazqo. 48808 tamaşaçı.
6-cı tur
Xorvatiya – Portuqaliya 1:1
Qvardiol, 66 – Feliş, 33.
Polşa – Şotlandiya 1:2
Pyontkovski, 59 – Makqinn, 3. Robertson, 90+2.
1. Portuqaliya 6 4 2 0 13-5 14
2. Xorvatiya 6 2 2 2 8-8 8
3. Şotlandiya 6 2 1 3 7-8 7
4. Polşa 6 1 1 4 9-16 4
Faktlar
* Ronaldo milli komandada qələbə sayına görə yeni rekord müəyyəndirdi. Portuqaliya yığmasının heyətində 132-ci dəfə qələbə sevinci yaşayan ulduz bu gostəricidə ispaniyalı Serxio Ramosu (131) arxada qoydu. Sonrakı pillələrdə isə ispaniyalı İker Kasilyas (121) ilə argentinalı Lionel Messi (119) qərarlaşıb.
* Ronaldo yığmada qol sayını 135-ə, oyun sayını isə 217-yə çatdırdı. Hər iki göstərici dünya rekordudu. Avropa yığmalarında oyun sayına görə Kriştianodan sonrakı pillələrdə qərarlaşanlar: Luka Modriç (Xorvatiya) – 183, Serxio Ramos (İspaniya) – 180, Canluici Buffon (İtaliya) – 176.
* Ronaldo dublla karyerasındakı qol sayını 910-a çatdırdı. Qolların 135-ni milli komandada, 775-ni klub səviyyəsində vurub.
Yeri gəlmişkən...
Qrup birinciliyini təmin edən Portuqaliya yığmasının baş məşqçisi Roberto Martines Ronaldo, Bruno Fernandeş, Bernardo Silva və Pedro Netoya dincəlmək imkanı yaradıb. Fernandeş onsuz da cəzalı duruma düşmüşdü. Adı çəkilən oyunçuların əvəzinə Jeovani Kenda (Sportinq), Fabio Silva (Las Palmas) və Tyaqo Calo (Portu) yığmanın düşərgəsinə çağrılıb.
Oyundan sonra
Roberto Martines, Portuqaliya yığmasının baş məşqçisi:
“Bu, iki hissədən ibarət oyun idi. İlk yarı çox pis keçdi, konsentrasiyanı itirdik və məyus olduq. Ancaq ikinci hissədə Portuqaliya yığmasının indiyəqədərki ən yaxşı oyununu gördüm. Hər oyunda qalib gəlmək və 5 qolu vurmaq asan deyil. Azarkeşlərimiz önündə xüsusi qələbə qazandıq. Vitinya çox yaxşı oynadı. Ancaq komandalar arasındakı fərq bir oyunçu ilə bağlı deyil. Mentallığı dəyişmişik, intensivliyi artırmışıq. Polşalılara oynamaq imkanı vermədik. Ronaldonun məşqlərdəki fədakarlığı həm də intizama və yorulmadan çalışmağa söykənir. Qol vurmağa davam edir və bunu dünya futbolunda ən yüksək səviyyədə bacarır”.
Zlatko Daliç, Xorvatiya yığmasının baş məşqçisi:
“Çox yaxşı oynadıq, xüsusən də ilk yarıda. İlk yarıda oyuna və topa nəzarət edirdik, planlaşdırğımız hər şeyi yerinə yetirirdik. Ancaq komandam meydanda azlıqda qalandan sonra bizə çox çətin oldu. Şotlandiya yığmasını qələbə münasibəti ilə təbrik edirəm. Şotlandiya pressinqdən fəal şəkildə yararlanan çox çətin rəqibdi”.
Digər xəbərlər
