"Sabah" Misli premyer-liqasının evdə keçirdiyi 15-ci tur matçında "Səbail"i məğlub etdi - 1:0.

"Football-plus.az" xəbər verir ki, "bayquşlar"ın baş məşqçisi Vasili Berezutski oyunsonrası mətbuat konfransında jurnalistlərin suallarını cavabladı.

- Birinci hissədə yaxşı çıxış etsək də, ikinci yarıda müdafiə olunduq. Amma ikinci qolu vurmalıydıq. Çalışacağıq ki, növbəti matçlarda daha məzmunlu oyun göstərək.

- Elvin Camalovun start heyətində olmamasının səbəbi nə idi? Kapitan niyə Pavol Şafranko oldu?
- Bu, məşqçilər korpusunun qərarı idi. Qarşıda xeyli oyun var. Dəyişikliklər edəcəyik. Məlum olduğu kimi, Elvin meydana çıxandan sonra sarğı ona verildi.

- Komandanın potensialı barədə nə deyə bilərsiz?
- Hücum xəttimizin potensialı çox yüksəkdi. Amma bəzi oyun komponentlərində daha çoxunu bacarmalıyıq. Çünki yüksək pillələrdə qərarlaşan komandalara qarşı mübarizə aparmalı və uğur qazanmalıyıq.

- Maqsud Adıgözəlov Rusiya mətbuatına açıqlamasında bildirib ki, komanda qısa müddətdə toparlanmalı və hədəflərə çatmalıdı. Söhbət hansı hədəfdən gedir?
- Avrokuboklara yollanmaq...

- Bunun üçün ölkə kubokuna daha çox köklənəcəksiz, yoxsa premyer-liqaya?
- Hər variant uyğundu. Amma qısa yol ölkə kubokudu.

- Məşqçilərin qərarı Elvin Camalovun start heyətində olmaması idi, yoxsa əsas kapitanın Pavol Şafranko olması?
- Pavolun emosional cəhətdən özünü daha yaxşı hiss etməsini istədik. Bu üzdən meydana kapitan kimi çıxardıq. Amma Elvin də hazırlaşır. Dediyim kimi, qarşıdakı oyunlarda dəyişiklik olacaq.

- Azərbaycana gəlməzdən əvvəl Murad Musayevlə danışmısız? Bura hansı fikirlərlə gəlmisiz?
- Düzü, Muradla danışmamışam. Amma o mənə mesaj yazdı və uğurlar arzuladı. Bilirəm ki, "Qarabağ" və "Sabah" avrokuboklarda çıxış edib. Musayevlə PRO kateqoriyasını oxuyanda mənə Azərbaycan futbolu haqda danışıb. Görürəm ki, onun dedikləri reallığa yaxındı.

- Sizə təklif kimdən gəldi? Düşünmək üçün nə qədər vaxtınız oldu?
- Təklif almağımla qəbul etməyim arasında çox məsafə olmadı. Hər şey qəfil baş verdi. "Sabah"ın təklifini qəbul etməyə bilməzdim.

- "Qarabağ"dan başqa hansı klubumuz haqda məlumatlısız?
- Məncə, Azərbaycan futbolu inkişaf edir. İnfrastruktura maliyyə ayrılır. İnanıram ki, hamımız birlikdə inkişaf edəcəyik.

KƏNAN BAHADIR