"Səbail"in məşqçilər korpusundan Şahin Diniyevlə birgə ayrılanlar sırasında təcrübəli mütəxəssis Azər Məmmədov da var.

"Football-plus.az" onunla əlaqə saxlayaraq hazırda nə işlə məşğul olduğunu və "dənizçilər"də çalışdığı dövrdə komandanın çıxışıyla bağlı diqqətiçəkən problemlərlə bağlı məlumat almağa çalışdı. Axı Bayıl təmsilçisi çempionatın baxımlı oyun göstərən azsaylı komandalarından olsa da, nəticələri ürəkaçan deyil.

Azər bəy saytımıza açıqlamasında hələ hansısa təklif almadığını və istirahət etdiyini dedi. O, "Səbail"lə bağlı problemlərin geridə qaldığını və bu mövzuda danışmaq istəmədiyini bildirdi. Maraqlıdı ki, Şahin Diniyev də komandayla bağlı eyni ifadələri səsləndirib...

Xatırladaq ki, "dənizçilər"i Misli premyer-liqasının 13-cü tur matçında meydana Elvin Məmmədov çıxardı. Komanda gənc mütəxəssisin rəhbərliyi altında keçirdiyi ev oyununda "Turan Tovuz"la heç-heçə etdi - 1:1.

KƏNAN BAHADIR