“Barselona”ya evdə biabırçı məğlubiyyət (0:4) Karlo Ançelottinin “Real”dakı mövqeyini zəiflədib. İndi onun qovulmaq ehtimalı var.

Klub rəhbərliyindəki bəzi şəxslər baş məşqçinin istefaya göndərilməsini istəyirlər. “Relevo”nun məlumatına görə, rəhbərliyin Ançelottidən narazılığı “El Klasiko”da məğlubiyyətdən sonra yaranıb. Adı açıqlanmayan şəxslər komandada gündəlik iş prosesinin təşkili formasını bəyənmirlər. Onlar həm də məşqçinin gənc futbolçulara münasibətindən və onlara inamının olmamasından narazıdılar. Sözügedən şəxsləri xüsusilə də Ançelottinin türkiyəli yarımmüdafiəçi Arda Gülərə hələ də lazımi şansı verməməsi narahat edir.

Rəhbərlik don Karlonun son illərdə klubun uğurlarına verdiyi töhfəni yüksək qiymətləndirir, lakin artıq onun komandadan getmək vaxtının yetişdiyini düşünür. “Relevo”nun məlumatında artıq paltardəyişmə otağında oyunçular arasında gərginlik yaranmağa başladığı da qeyd edilib. Bununla belə, Madrid klubunun prezidenti Florentino Peresin Ançelottiyə hələ də etimad göstərdiyi də qeyd edilir. Yeri gəlmişkən, italiyalı mütəxəssis “Real”a sonuncu dəfə 2021-ci ilin yayında təyinat alıb. O, komandanaı ilk dəfə 2013-15-ci illərdə çalışdırıb.