"Görülən işlərin hamısı UEFA-nın tələbləriylə bağlı deyil" - Santuş Qəbələ şəhər stadionunda dəyişiklik edilməsini istəyib
Millimiz noyabrın 16-da Millətlər Liqasının 4-cü turunda Estoniyanı qəbul edəcək. Bilindiyi kimi, matç COP 29 üzündən paytaxtda yox, Qəbələ şəhər stadionunda keçiriləcək.
AFFA-nın icraçı vitse-prezidenti Sərxan Hacıyev və yığmamızın baş məqşçisi Fernando Santuşla yanaşı, UEFA nümayəndələri də stadiona baxış keçirib və müvafiq tapşırıqlar veriblər.
Maraqlıdı, görəsən, stadionda hansı dəyişikliklər zəruri sayılıb? Axı idman qurğusu beynəlxalq oyunların baş tutması üçün lazım olan bütün tələblərə cavab verir və əvvəllər də burda belə qarşılaşmalara şahidlik etmişik.
"Football-plus.az"ın sualını "Qəbələ"nin idman direktoru Səbuhi Səfiyarlı cavabladı:
"Görülən işlərin hamısı UEFA-nın tələbləriylə bağlı deyil. Bu sırada millimizin baş məşqçisi Fernando Santuşun bəzi istəkləri də var. Ümumi proses isə paltardəyişmə otaqlarını, televiziya yayınının maneəsiz və keyfiyyətli təşkilini, həmçinin media nümayəndələri üçün yerlərin ayrılmasını və onlar üçün rahat iş mühitinin yaradılmasını əhatə edir. Stadionun vəziyyətiylə bağlı ciddi problem yoxdu. Hər şey qaydasındadı. Bəli, idman qurğusu onsuz da tələblərə cavab verəcək səviyyədədi. Bu səbəbdən köklü dəyişikliklərə ehtiyac duyulmadı. Qısası, stadionumuzun yığmanın oyununu qəbul etməsi üçün hansısa əngəl yoxdu".
KƏNAN BAHADIR
