Misli premyer-liqasının 11-ci turunda "Zirə"ni qəbul edən "Araz-Naxçıvan" heç-heçə etdi - 1:1.

"Football-plus.az" xəbər verir ki, "qırmızı-ağlar"ın baş məşqçisi Elmar Baxşıyev oyunsonrası mətbuat konfransında jurnalistlərin suallarını cavabladı.

- Dinamik və mübarizəli oyunun şahidi olduq. Hər iki komanda yaxşı nəticə qazanmağa çalışırdı. Futbolçularımın oyunundan razı qaldım. Əvvəldən qurduğumuz planları yerinə yetirə bildik. Növbəti oyuna hazırlaşacağıq.

- Son dəqiqələrdə təzyiqi artırmışdız. Penalti olmasa belə, bərabərlik qolunu vura biləcəyinizə inanırdız?
- Bunu dəqiq deyə bilmərəm. Hər şey ola bilərdi. Məni sevindirən məqam komandamın oyundan qopmaması, sona qədər öz şansını axtarmasıydı. Uduza da bilərdik. Vacib məsələ oyunun yaxşı təşkil olunmasıdı.

- Bu mövsüm yalnız "Qarabağ"a uduzmusuz. Ağdam təmsilçisinin gücünü nəzərə alsaq, həmin məğlubiyyət başadüşüləndi. Bəs məğlubiyyətsizlik seriyası komandadaxili ab-havaya necə təsir edir?
- "Qarabağ"a böyük hesabla uduzsaq da, qorxuya düşmədik. Həftəlik proqramımız davam edir. Futbolçularım təzyiq altında çıxış edə biləcək qədər təcrübəlidi. Yenə də komandamın daha çoxunu bacaracağına inanıram. Rəngarəng ola bilərik. Bu, maksimum gücümüz deyil.

- İddialara görə, üçüncü dövrədən etibarən Naxçıvanda meydana çıxacaqsız. Bu baş versə, komandaya mənfi təsirləri olacaqmı? Çünki Mərdəkanda 20-30 azarkeş önündə çıxış edirsiz. Muxtar Respublikada isə tələb və təzyiq çox olacaq. Hesabda geri düşəndə narazılıq yarana bilər.
- Mənə hansısa mənfi təsiri olacağını düşünmürəm. Futbolçularım da azarkeşlərin önündə oynamaq istəyir. Futbolda qol buraxmaq da var, vurmaq da. Tərəfdarlarımızın dəstəyi altında meydana çıxsaq, daha yaxşı olar. Bunu dəfələrlə demişəm. Çox istərdim ki, öz diyarımızda oynayaq, sevincimizi Naxçıvan camaatıyla bölüşək. Mən baş məşqçi kimi üzərimə düşəni edirəm və edəcəm. Rəhbərlikdən xahiş edirəm ki, "Araz-Naxçıvan"ı Naxçıvana aparsın.

- Naxçıvana qayıtsaz, orda məskunlacaqsız? Bəzi futbolçular buna razı olmaya bilərmi?
- Normal və sağlam kollektivimiz var. Hamısı uğur qazanmaq istəyir. Uğur hardadısa, orda yaşamağa, ab-havasına uyğunlaşmağa hazırdılar. Sadəcə, bizə bu şəraitı yaratmalıdılar.

- Dünən Sərxan Hacıyevə belə sual ünvanlandı: Qəbələnin stadionu qısa müddətdə UEFA-nın standartlarına uyğun hala gətirilir. Naxçıvanın stadionu iki ildi niyə təmir olunmur? Bu gün mütəxəssislər, futbol adamları, naxçıvanlı azarkeşlər komandanın Naxçıvanda meydana çıxmasını istəyir. Düzdü, deyə bilərsiz ki, bu mövzu sizə aid deyil. Amma siz rəhbərliklə bu barədə danışmısızmı?
- Düzdü, hər kəs "Araz-Naxçıvan"ın evində meydana çıxmasını istəyir. Amma məsələ məhz klub rəhbərliyi ilə bağlı deyil. Naxçıvan rəhbərliyi də bunu istəməli, bizə dəstək olmalıdı. "Araz-Naxçıvan" nə Elmar Baxşıyevin, nə də klub rəhbərinin komandasıdı. Kollektiv Naxçıvanındı, bu bölgəni təmsil edir. Naxçıvan rəhbərliyi də bizə jest etməlidi.

KƏNAN BAHADIR