Həftəsonu Amerikanın Ostin şəhərində “Formula-1” üzrə dünya çempionatının final mərhələsi start götürəcək.

Xatırladaq ki, komandalar son dörd həftədə dincəlib. 2024 mövsümünün sonuna isə cəmi 6 mərhələ qalır. Demək olar ki, çempionluq intriqasının yaşanmadığı 2022, 2023-cü illərdən fərqli indi maraqlı mənzərə yaranıb. Bəli, üçqat dünya çempionu, “Red Bull”un niderlandlı pilotu Maks Ferstappen hazırda 52 xal fərqi ilə liderdi, ancaq ümumi fikir belədi ki, indi onun britaniyalı izləyicisi, “Maklaren”in pilotu Lando Norris daha sürətli maşına malikdi. Deməli, son 6 mərhələdə və 3 sprint yarışında aradakı xal fərqinin “əriməsi” tam mümkündü. Ancaq alınacaqmı?

“Maklaren” “Red Bull”u arxada qoydu
2024 çempionatının ilk yarısında Ferstappenin bütün başqaları üzərindəki üstünlüyü qətiyyən şübhə doğurmurdu. 10 “Qran-pri”dən yeddisində qalib gələn Maks ümumi hesabda dominantlıq edirdi. Ancaq sonradan “Red Bull” qəfil mövqeyini əldən verməyə başladı, çempionatın sürətinə görə ən yaxşı bolidindən 2-ci, 3-cü, bəzi trasslarda isə hətta 4-cü maşınına çevrildi. Çoxları bunu hələ mövsümün əvvəlində başlayan kollektivdaxili ixtilafla bağlayırdı. Axı əməkdaşlardan biri “Red Bull”un rəhbəri Kristian Horneri seksual qısnama cəhdində suçlayırdı.

Onda Horneri təmizə çıxarsalar da, həmin hadisənin izləri qaldı. Bundan başqa, Kristianla “Red Bull”un nüfuzlu məsləhətçisi Helmut Marko arasındakı münaqişə müzakirə olunmaqdaydı. Maksın atası, “Formula-1”in sabiq pilotu Yos Ferstappen isə ifadə seçimində utanmadan, ümumiyyətlə, Hornerin istefasının zəruriliyi haqda danışdı. Nəticədə dahi mühəndis Edrian Nyui kollektivdən ayrılmağa qərar verdi (onun növbəti iş yeri 2025-ci ildən “Aston Martin” olacaq), rəqiblərin uğurları fonunda “Red Bull”un bolidi geriləməyə başladı. Elə Maks özü də tez-tez əsəbləşir, özündən çıxır, hətta söyürdü. Vəziyyət o yerə gəlib çatdı ki, Sinqapur “Qran-pri”sində stüardların qəzəbinə tuş gəldi, ictimai iş görməyə məcbur edildi. Eyni zamanda, Ferstappen qələbə qazanmağı tərgitdi. Son 8 mərhələdəki nəticələrə baxaq. Niderlandlı pilot 3 dəfə finişə 2-ci, daha 3 dəfə 5-ci yerdə çatıb, 1 dəfə 4-cü, 1 dəfə də 6-cı olub. Bu müddətdə iki mərhələnin qalibi Norris olub, onun “Maklaren”dən olan komanda yoldaşı, avstraliyalı Oskar Piastri və yeddiqat dünya çempionu, britaniyalı Lüis Hemiltin (Mersedes) də iki dəfə finişə hamıdan tez çatıb. “Ferrari”nin monakolu pilotu Şarl Leklerin və “Mersedes”in britaniyalı pilotu Corc Rassellin də hərəyə bir qələbəsi var. “Red Bull”un Mühəndislər kubokundakı üstünlüyü artıq “əriyib”, hazırda “Maklaren” 41 xal fərqi ilə öndədi.

Psixoloji oyunlar artıq başlayıb
Elə çempionatda da hər şey birmənalı deyil. Norris yüksək templə olmasa da, hər halda, yaxınlaşır – o, son altı mərhələdə Ferstappendən geriliyi 40 xal azaldıb. Hətta Leklerlə Piastri də liderə yaxınlaşmaqdadı, baxmayaraq ki, onlar hələ Maksdan yetərincə uzaqdı. Norris niderlandlıya 52 xal uduzursa, Leklerin geriliyi 86-ya, Piastrininki isə 94-ə bərabərdi. Xatırladaq ki, hər “Qran-pri”də qələbəyə görə 25, sprintdə qələbəyə görə 8 xal verilir. Bundan başqa, uzun yarışda ən sürətli dövrəyə görə də xal verilir. Odu ki, hələ də 180 xal ortadadı, “Ferrari”nin ispan pilotu Karlos Sayns ilə Hemilton də nəzərə cəhətdən titul şansını qoruyur. Ancaq aydındı ki, Maks müntəzəm uğursuzluğa düçar olmayacaq, mövsüm ərzində yalnız bir dəfə finişə çatmayıb. Bu üzdən onun real rəqibi yalnız fasilə ərəfəsində keçirilən Sinqapur mərhələsində dominant üslubunda qalib gələn Norrisdi.

Prinsipcə qalan mərhələlərdə (sprint qarışıq 9) Ferstappenə finişə 2-ci yerdə çatmaq da bəs edəcək. Belə nəticə ona 129 xal qazandırardı. Lando hətta maksimal, yəni 180 xal toplasa belə, sonda Maksdan 1 xal geri qalacaq. O da hamıya aydındı ki, Norrisin 9 dəfə finişə birinci çatması mümkünsüzdü. Digər tərəfdən, Maksdan Piastri, həmçinin “Ferrari” ilə “Mersedes”in pilotları da xal ala bilsə, onda “Maklaren”in pilotuna 150-160 xal da bəs edər ki, bu, az-çox real görünür.
Yeri gəlmişkən, artıq komanda rəhbərlərinin psixoloji savaşı başlayıb. “Maklaren”in baş direktoru Zek Braunun “Red Bull”a ünvanlanan atmacasına baxın:

Maks Ferstappen Braunun atmacasına belə cavab verib: “Adamlar diqqətini öz komandasına yönəltsə, daha yaxşı olar”. “Red Bull”un məsləhətçisi Helmut Marko daha sərt cavab verib:


Şəxsi zaçot
1. Maks Ferstappen (Niderland, “Red Bull”) 331 xal
2. Lando Norris (B.Britaniya, “Maklaren”) 279
3. Şarl Lekler (Monako, “Ferrari”) 245
4. Oskar Piastri (Avstraliya, “Maklaren”) 237
5. Karlos Sayns (İspaniya, “Ferrari”) 190
6. Lüis Hemilton (B.Britaniya, “Mersedes”) 174
7. Corc Rassell (B.Britaniya, “Mersedes”) 155
8. Serxio Peres (Meksika, “Red Bull”) 144

Mühəndislər kuboku
1. “Maklaren” 516
2. “Red Bull” 475
3. “Ferrari” 441
4. “Mersedes” 329
5. “Aston Martin” 86
6. RB 34
7. “Haas” 31
8. “Uilyams” 16