C liqasının 3-cü qrupunda 3-cü turun oyunlarından sonra iki komandanın şərikli liderliyi davam etdi.

İlk turda öz aralarında UEFA-nın məlum qadağası səbəbindən neytral meydanda - Macarıstanın Zalaeqerseq şəhərində keçirilən matçda qolsuz heç-heçəyə razılaşan Belarus və Bolqarıstan növbəti oyunlarını qələbə ilə başa vurmuşdular. Şərikli liderlər bu dəfə rəqibləri ilə “sülh bağladılar”.

Sentyabrın 8-də Lüksemburqu minimal hesabla üstələyən Belarus yığması 2024-cü ildə ilk dəfə qalib gəlmişdi. 5 oyunluq qələbəsizliyə son qoyan ispaniyalı Karlos Alosun komandası 3-cü turun Şimali İrlandiya ilə ev oyununu da Zalaeqerseqdə keçirdi. Adalılar ilk dəqiqələrdən təşəbbüsü ələ almaqla neytral meydanda yalnz qələbə qazanmaq istəklərindən xəbər verdilər. Birinci hissəni əla keçirən Maykl O’Nilin komandası hesabı açmaq üçün yetərincə şansa malik oldu. Lakin buna hər dəfə Lapouxov imkan vermədi. Qonaqlar ilk 45 dəqiqədə qapıya 12 zərbə endirdilər. Bunlardan “çərçivə”yə düşən 7 zərbənin hamısına belarus qapıçı mane oldu. Bir epizodda isə nominal ev sahiblərini qoldan dirək xilas etdi. Alosun komandası matçın ilk yarısında hücumda çox sönük təsir bağışladı və aydın olduğu kimi, britaniyalıların fasiləyə azı minimal üstünlüklə yollana bilməməsi böyük ölçüdə rəqib qapıçının möhtəşəm oyununa görə oldu. İkinci hissədə postsovet məkanının təmsilçisi oyun planında nisbətən yaxşı görünsə də, rəqib qapısı qarşısında real qol vəziyyəti yarada bilmədi. Nəticədə ilk yarısı qonaq komandanın büyük üstünlüyü ilə yadda qalan matç başladığı hesabla sona çatdı. 3-cü oyunda da qapısını toxunulmaz saxlayan Belarus yığması şərikli liderliyi davam etdirdi.

Qrupun digər oyunu da favoritin xal itkisi ilə nəticələndi. Bolqarıstan yığması Lüksemburq üzərində qələbə qazanacağı halda liderliyi ələ alacaqdı. Lakin bu baş vermədi. Gözlənildiyi kimi, Plovdivdə baş tutan matç ev sahiblərinin ərazi üstünlüyü ilə keçdi. Amma bolqarlar oyun ərzində qapıya zərbələr üzrə rəqibini yalnız 7:6 hesabıyla üstələyə bildilər. Onların dəqiq zərbələrinin sayı isə yalnız 3-ə bərabər oldu ki, hər bir halda qapıçı Moris qola imkan vermədi. Bir sözlə, “Xristo Botev” stadionundakı matçın nəticəsi Belarus üçün sürpriz hədiyyə oldu. Bu komanda ilə göstəriciləri eyni olan Bolqarıstan yaxşı imkanı dəyərləndirə bilmədi. Lüksemburq isə qrupda ilk xalını qazandı. Maraqlıdı ki, “cırtdanlar” növbəti oyununu neytral meydanda Belarusa qarşı keçirəcəklər.

C liqası, 3-cü qrup
3-cü tur
Belarus - Şimali İrlandiya 0:0
Belarus: Lapouxov, Peçenin, Zabelin, Politeviç, Kovalyov (Karpoviç, 64), Volkov, Yablonski, Ebonq, Korzun (Boçarov, 90+1), Antilevski (Kontsevoy, 75), Şikavka (Barkovski, 64).
Şimali İrlandiya: P.Çarlz, Lüis (Spenser, 67), Toal, Makneyr, Ham, Bredli, Sevill (Makkann, 83), Ş.Çarlz, Prays (Smit, 83), Marşall (D.Çarlz, 67), Rid (Bonis, 76).
Vərəqələr: Peçenin, 18. Politeviç, 41. Toal, 43 - sarı.
Hakim: Henrik Nalbandyan (Ermənistan).
12 oktyabr. Zalaeqerseq. Tamaşaçısız.

Bolqarıstan - Lüksemburq 0:0
Bolqarıstan: Mitov, Atanasov, Antov (Dimitrov, 63), Popov, A.Petkov, Kostadinov (Çoçev, 83), Nürnberger, Krastev, Kirilov (M.Minçev, 63), Kolev (G.Minçev, 76 ), Despodov.
Lüksemburq: Moris, Yans, Pinto (D’Anziko, 61), Bonert, Karlson (M.Martins, 90), Koraç, K.Martins, Sinani, Barreyro, Olesen, Çurçi (J.Rodriges, 46).
Vərəqələr: Kolev, 4. Çurçi, 17. Antov, 20. K.Martins, 27. Karlson, 36. A.Petkov, 38. Atanasov, 45. Nürnberger, 51. Bonert, 51. J.Rodriges, 60. Kostadinov, 64 - sarı.
Hakim: David Şmayts (Sloveniya).
12 oktyabr. Plovdiv. 15800 tamaşaçı.

1. Belarus 3 1 2 0 1-0 5
2. Bolqarıstan 3 1 2 0 1-0 5
3. Şimali İrlandiya 3 1 1 1 2-1 4
4. Lüksemburq 3 0 1 2 0-3 1