B liqasının 1-ci qrupunda keçirilən 3-cü turun oyunları arasında daha çox maraq doğuranı postsovet məkanından olan iki yığmanın görüşü idi. Səbəb sadədi: komandalardan biri ilk matçda qələbə qazanmış, digəri isə məğlub olmuşdu.

Ukrayna yığması məlum səbəbdən neytral meydanda – Polşanın Poznan şəhərində keçirilən matç ərəfəsində çox acınacaqlı vəziyyətdə idi. Albaniya (1:2) və Çexiyaya (2:3) ardıcıl iki məğlubiyət Sergey Rebrovun komandadakı mövqeyini yetərincə zəiflətmişdi. Növbəti uğursuzluq baş verəcəyi halda onun baş məşqçi postundan gedişinə səbəb ola bilərdi.

Tiflisdə Çexiyaya 4:1, Tiranada Albaniyaya 2:1 hesabıyla qalib gələn Gürcüstan yığması bu yay keçirilən Avropa çempionatından sonra qitədəki mövqeyini daha da gücləndirmişdi. Ukrayna əla formada olan rəqibini məğlub etməklə qrupdakı vəziyyətini normallaşdırmağa çalışacaqdı. Amma bu vəzifəni reallaşdırmaq heç də asan görünmürdü. Belə ki, Rebrov zədə səbəbindən Poznanda Lunin, Mikolenko, Zinçenko, Yarmolenko, Malinovski və Sıqankovdan, həmçinin indi optimal formada olmayan dayaq yarımmüdafiəçisi Stepanenkodan yararlana bilməyəcəkdi. Sonuncunu Gürcüstanla matçda normal şəraitdə yığmaya çağrılmayan Kalyujnı əvəzləməliydi. Ukrayna üçün ikinci çətin amil isə rəqibin gücü ilə bağlı idi.

Qeyd etdiyimiz kimi, Villi Sanyolun komandası qrupda vahid lider idi. Həm də Gürcüstan yığması Polşaya döyüşkən heyətlə gəlmişdi. Yəni qafqazlıların zədə ilə bağlı problemi yox idi. Sanki yaşıl meydanın vəziyyəti də ukraynalların əleyhinə yönəlmişdi: Poznan şəhər stadionunun qazonu xüsusilə cərimə meydançalarında yarıtmaz halda idi.

Start fitindən 13 dəqiqə sonra stadionun bir hissəsində işıqların sönməsi matçın təxminən 5 dəqiqə dayanmasına səbəb oldu. Sırf idman mübarizəsinə gəlincə, Rebrovun komandası 35-ci dəqiqədə hesabı açdı. Bunu Sudakovun ötürməsi ilə Mudrikin bacarması bir qədər gözlənilməz oldu. Çünki o, “Çelsi”yə böyük pullara başa gəlsə də, londonluların əsas heyətində heç cür möhkəmlənə bilməyib. Üstəlik klubda sonuncu qolunu mayda, milli formada isə martda vurmuşdu. Amma qafqazlıların qapısına yol tapdığı epizodu izləməyə dəyərdi. Qeyd edək ki, Sanyolun komandası həm Mudrikin qoluna qədər, həm də hesab açılandan sonra rəqibə qarşı ciddi nəsə edə bilmədi. İlk bir saatlıq mübarizə Ukraynanın təzyiqi və rəqibin müdafiə olunması şəraitində keçdi. Qafqazlılar yalnız 2-ci hissənin ortalarında bir neçə əks-hücumla ukraynalıları əməlli-başlı təlaşa salmağı bacardılar. Bu məqamda meydana çıxan Davitaşvili hətta 88-ci dəqiqədə Trubini aldadaraq qapıya yol tapdı. Lakin Kvaratsxeliyanın ofsaydda olması səbəbindən qol qeydə alınmadı. “Napoli”ni vingerinin vacib matçda çox zəif təsir bağışladığını da qeyd edək.

Beləliklə, minimal hesabla qalib gələn Ukrayna qitə çempionatından başlayan uğursuzluğa son qoydu. Gürcüstan isə ilk dəfə büdrəsə də, topların daha yaxşı fərqinə əsasən 1-ci yerdə qaldı.

Sanyolun komandasının ilk turda darmadağın etdiyi Çexiya ardıcıl ikinci qələbə ilə xalını 6-ya çatdırdı. Slavyanlar evdə Albaniyaya iki cavabsız qolla qalib gəldilər. Dubl edən Xorı matçın qəhrəmanı oldu. Amma albanların bir neçə qol şansından yararlana bilmədiyini də qeyd edək.

B liqası, 1-ci qrup
3-cü tur
Ukrayna - Gürcüstan 1:0 (1:0)
Ukrayna: Trubin, Matviyenko, Konoplya, Zabarnı, Talovyerov, Qutsulyak (Zubkov, 75), Kalyujnı (Kriskiv, 90+1), Şaparenko, Mudrik (Nazarenko, 86), Sudakov (Svatok, 90+1), Dovbik (Yaremçuk, 75).
Gürcüstan: Mamardaşvili, Kaşiya, Qvelesiani (Zivzivadze, 82), Kakabadze, Dvali, Loçoşvili (Şengeliya, 60), Kiteişvili, Koçoraşvili (Davitaşvili, 71), Çakvetadze, Kvaratsxeliya, Mikautadze.
Qol: Mudrik, 35.
Vərəqələr: Kaşiya, 11. Matviyenko, 28. Dvali, 39. Kalyujnı, 45+5. Koçoraşvili, 63. Şengeliya, 69. Konoplya, 75. Talovyerov, 79 - sarı.
Hakim: Yulian Vaynberger (Avstriya).
11 oktyabr. Poznan. 21700 tamaşaçı.

Çexiya - Albaniya 2:0 (1:0)
Çexiya: Kovarj, Borjil, Tsoufal, Qoleş, Vitik, Provod (Linqr, 88), Souçek, Şults (Çvançara, 90+2), Çerv (Kral, 90+2), Xorı (Kuxta, 87), Çernı (Qlojek, 69).
Albaniya: Strakoşa, Hüsay, Kumbulla, İsmayli, Mitay, Laçi (Seferi, 79), Ramadani, Bayrami (Muçi, 88), Asllani, Asani (Hoxa, 65), Daku (Tutsi. 65).
Qollar: Xorı, 3 (1:0). Xorı, 63 (2:0).
Vərəqələr: Daku, 44. Qlojek, 82 - sarı.
Hakim: Benua Bastyen (Fransa).
11 oktyabr. Praqa. 17823 tamaşaçı.

4-cü tur
Gürcüstan –Albaniya 0:1
Asllani, 48.

Ukrayna – Çexiya 1:1
Dovbik, 53-p. – Çerv, 18.

1. Çexiya 4 2 1 1 7-7 7
2. Gürcüstan 4 2 0 2 5-3 6
3. Albaniya 4 2 0 2 3-4 6
4. Ukrayna 4 1 1 2 5-6 4