B liqasının 1-ci qrupunda keçirilən ilk oyunlarda az-çox sürpriz nəticələr qeydə alındı. Postsovet məkanından olan iki komandadan biri inamlı qələbə qazandı, digəri isə məğlub oldu.

Maraqlıdı ki, bu qrupda çıxış edən bütün komandalar Almaniyada keçirilən Avropa çempionatının iştirakçısı olub. Onlardan Gürcüstan ilə Çexiya qrupda qarşılaşmışdılar. Bu komandalar arasında iyunun 22-də Hamburqda keçirilən matç 1:1 hesabı ilə nəticələnmişdi. Görünür, Villi Sanyol bu dəfə gürcüləri slavyanlarla oyuna daha yaxşı hazırlayıbmış. Əslində fransalı mütəxəssisin çalışdırdığı komanda çexlərdən bir sıra statistik göstəricilərdə geri qaldı. Qitə çempionatının qəhrəmanlarından olan Mamardaşvili 4 seyv etməklə qələbədə az-çox rol oynadı.

Matçın qəhrəmanları isə hərəyə bir qol vuran və məhsuldar ötürmə verən Kvaratsxeliya ilə Çakvetadze oldular. 4:1 hesabıyla qalib gələn Gürcüstan yığması Millətlər Liqasına inamlı qələbə ilə başladı.

Məlum səbəbdən Praqada keçirilən Ukrayna – Albaniya matçının ilk yarısında qapılara qol vurulmadı. Amma fasilədən sonra vəziyyət köklü surətdə dəyişdi. Əvvəlcə oyun planında üstün təsir bağılayan Ukrayna yığması Konoplya ilə hesabı açdı. Ancaq Sergey Rebrovun komandası hücumları məntiqi sonluğa çatdırmaqda çətinlik çəkirdi. Albanlar isə qapıya dəqiq zərbələr planında rəqibini 5:3 hesabıyla üstələdi. Daha effektli oyunu ilə seçilən Silvinyonun komandası 2:1 hesablı əzmkar qələbə ilə ilk turdan Gürcüstanla şərikli lider oldu.

B liqası, 1-ci qrup
1-ci tur
Gürcüstan – Çexiya 4:1 (1:0)
Gürcüstan: Mamardaşvili, Kaşiya, Qvelesiani (Qoqliçidze, 88), Kakabadze (Qoçoleişvili, 65), Dvali, Loçoşvili, Kiteişvili (Nonikaşvili, 75), Koçoraşvili, Çakvetadze (Davitaşvili, 75), Kvaratsxeliya, Mikautadze (Zivzivadze, 75).
Çexiya: Kovarj, Tsoufal, Kreyçi, Rineş (Zeleni, 26), Qranaç, Zima, Provod (Şults, 76), Souçek, Kral (Kalvax, 46), Şik (Qlojek, 68), Çvançara (Linqr, 46).
Qollar: Kvaratsxeliya, 33-p. (1:0). Çakvetadze, 53 (2:0). Mikautadze, 63 (3:0). Koçoraşvili, 66 (4:0). Kalvax, 80 (4:1).
Vərəqələr: Tsoufal, 16. Kral, 38. Kvaratsxeliya, 74. Kreyçi, 81. Nonikaşvili, 85. Koçoraşvili, 86 - sarı.
Hakim: Orel Qrinfild (İsrail).
7 sentyabr. Tiflis. 20401 tamaşaçı.

Ukrayna – Albaniya 1:2 (0:0)
Ukrayna: Trubin, Matviyenko, Mikolenko, Konoplya, Zabarnı, Kabayev (Pixalenok, 72), Şaparenko (Vanat, 73), Sudakov (Yarmolenko, 72), Brajko (Malinovski, 81), Yaremçuk, Sıqankov (Zinçenko, 81).
Albaniya: Strakoşa, Hüsay, Kumbulla, İsmaili, Mitay, Laçi (Berişa, 73), Ramadani, Bayrami (Hoxa, 73), Asllani, Asani, Manay.
Qollar: Konoplya, 49 (1:0). İsmayli, 54 (1:1). Asani, 66 (1:2).
Vərəqələr: Asani, 68. Strakoşa, 90 - sarı.
Hakim: Luis Qodinyo (Portuqaliya).
7 sentyabr. Praqa. 15500 tamaşaçı.
10 sentyabr: Çexiya - Ukrayna, Albaniya – Gürcüstan.