Yığmamız Millətlər Liqasının yeni mövsümünə uğursuz başlayıb.

Komanda ilk üç oyunda acınacaqlı məğlubiyyətlərlə üzləşib. Evdə İsveçə (1:3), səfərdə Slovakiyaya (0:2) uduzmağı anlayışla qarşılamaq mümkün idisə, aşkar autsayder Estoniyanın meydanını əli ətəyindən uzun tərk etməyin bir adı var: fiasko!

Uğursuzluqlar yığmamızın və baş məşqçi Fernando Santuşun göstəricilərinə təsirsiz ötüşməyib. Belə ki, kollektiv Millətlər Liqasında ilk dəfə ardıcıl üçüncü oyunda xalsız qalmaqla yanaşı, qol buraxıb. Bu, yüngül desək, yeni antirekorddu! Başqa adları isə biabırçılıq, milli formaya hörmətsizlik, Azərbaycan adına ləkədi! FİFA reytinqində 113-cü pillədən 115-ci yerə geriləməyimiz də öz yerində.

Portuqaliyalı ünlü və təcrübəli məşqçisi Fernando Santuş da milli komandalarla bağlı karyerasının ən qaranlıq dönəmini yaşayır. O, Azərbaycana ayaq basana qədər ardıcıl nəinki üç, iki oyunda belə uduzmamışdı. Bir neçə həftə əvvəl "Santuşu da "milliləşdirdik" ifadəsini söz xatirinə yazmamışdıq. Görünür, həmin proses sürətlə davam edir.

Yeri gəlmişkən, Mehdi Cənnətov Slovakiya ilə oyunda çoxsaylı seyvləri sayəsində diqqəti çəkdisə, Estoniya ilə matçdan sonra millimizin tarixində ilk dörd oyunda 8 qol buraxan ikinci qapıçı olmaqla karyerasını ləkələdi! Hücum cəhdlərinin ən fəalı Ramil və Elvin idisə, onlar da yetərincə xəsis oynadı.

Ən əsası, yığmamızda liderin olmadığını gördük. Son üç oyunda kapitan sarğısını Emin Mahmudov, Elvin Camalov və Abbas Hüseynovun qolunda görmüşük. Sən demə, əsas kapitan Bədavi Hüseynov imiş. O da Azərbaycan dilini bilmədiyindən bazubənd Abbasa həvalə edilib. Vəziyyət o qədər biabırçıdı ki, növbəti oyunda kimin kapitan olacağını bilmirik.

Əlqərəz, indi "dibə doğru gedirik" demək üçün çox gecdi. Artıq turnir cədvəlinin sonuncu pilləsindəyik. Qarşıdan Slovakiyayla matç gəlir. Ümumi ab-havanın tutqun olduğunu nəzərə alsaq, nəinki qələbəyə, heç-heçəyə belə inam yoxdu. Yeganə ümid yerimiz “doğma divarlar”dı. Yaxşı ki, oyun Bakıda keçiriləcək. Daha Oserdə və ya Tallində yox...

KƏNAN BAHADIR