Yığmamız bu gün Millətlər Liqasının C liqası çərçivəsində növbəti oyununu keçirəcək.

Matç “CBC Sport”la canlı yayınlanacaq.

Millətlər Liqası
qrup mərhələsi, 4-cü tur
Azərbaycan – Slovakiya 1:3
Toral Bayramov, 38.- Rahil Məmmədov, 15-öz qapısına. Lukas Haraslin, 75. David Duris, 87.
Qırmızı vərəqə: Mahir Emreli, 71.
Bakı, Tofiq Bəhramov adına Respublika stadionu. Saat 20.00.

Yığmamızı qrupun iddialı iştirakçısıyla çətin qarşılaşma gözləyir. Təxminən bir ay əvvəl – sentyabrın 8-də bu rəqibə səfərdə 0:2 uduzmuşuq. İndi isə həmin məğlubiyyətin əvəzini çıxmaq lazımdı. Təbii ki, “doğma divarlar”ın köməyi ilə!

Xatırlayırsızsa, yığmamız öz meydanında, daha doğrusu “Tofiq Bəhramov”da sonuncu matçını sentyabıın 5-də İsveçə qarşı keçirdi – 1:3. Elə həmin qarşılaşmadan sonra kollektivin qüsurlarıyla yanaşı, əzmkar çıxışını, gərgin mübarizədən qopmaq istəmədiyini, sona qədər döyüşdüyünü, hətta 82-ci dəqiqədə Renat Dadaşovun qolu sayəsində böyükhesablı məğlubiyyətdən yaxa qurtardığını yazmışdıq. Hər halda, milli ölkənin hüdudları çərçivəsində, adətən, yaxşı oyunla yadda qalır. Düzdü, Slovakiya bizdən üstündü. Biabırçı səhvlər olmadıqca, mümkün məğlubiyyəti anlayışla qarşılamaq olar. Lakin Fernando Santuşda və komandasında qələbə əzmini görmək futbolsevərlər üçün daha vacibdi.

Slovakiya ilə indiyə qədər bütün turnirlər çərçivəsində 11 dəfə üz-üzə gəlmişik. Bunların 2-də qələbə qazanmışıq, 9-da uduzmuşuq. Topların nisbətində də rəqib öndədi – 23:7. Statistika bizi çəkindirməlidimi? Əsla! Çünki Millətlər Liqasının 2022/23 mövsümündə bu rəqibə səfərdə qalib gəlmişik. Ətraflı desək, 2022-ci il sentyabrın 22-də Trnavada keçirilən oyun meydan sahiblərinin 1:2 hesablı məğlubiyyəti ilə bitib. İndi yenidən üz-üzəyiksə, uğuru təkrarlamağa çalışmalıyıq. O başqa məsələ ki, ilk qələbəmiz 2001-ci ildə baş tutan dünya çempionatının seçmə mərhələsində qeydə alınıb! Düzü, üçüncü qələbə üçün daha 21 il gözləmək vahiməli səslənir...

Bakıya gələn Slovakiya millisinin heyətində dəyişikliklər var. Komandaya yeni simalar cəlb olunub. Bunlar qapıçı Dominik Takaç, müdafiəçi Timotey Qranika və yarımmüdafiəçilər Patrik Qroşovskiylə Kristian Hertsdi. Ötən ay yığmamızın qapısına qollar vuran Andrey Duda ilə David Strelets də Bakıda görünəcək. Qalan futbolçuları isə sentyabrda şahidlik etdiyimiz ilk oyundan tanıyırıq. Bu siyahıdan, təbii ki, David Hantsko, Milan Şkrinyar, Stanislav Lobotka kimi futbolçuları fərqləndirməliyik.

Hər halda, onlar start heyətinin daimi üzvləri sırasındadı. FİFA reytinqində 42-ci pillədə olan komandanı 2022-ci ildən bəri Françesko Kalçona çalışdırır. Yəni Fernando Santuş millimizlə birgə ikinci dəfə bu mütəxəssislə üzləşəcək. Yəqin ki, portuqaliyalı rəqibiylə ilk oyununu unutmayıb və müəyyən nəticələr çıxarmaq üçün ehtiyacı olan məlumatlara sahibdi.

KƏNAN BAHADIR