"Azərbaycan texnika baxımından çox yaxşı komandadı, rəqibin meydanına yaxşı keçmək bacarıqları var. Millətlər Liqasına yaxşı başlamadılar, lakin evdə çox güclü rəqibdi. Burda qələbə qazanmaq üçün bacardığımız qədər yaxşı oynamalıyıq”.

“Football-plus.az” xəbər verir ki, bu sözləri Slovakiya millisinin baş məşqçisi Françesko Kaltsona deyib.

O, jurnalistlərin suallarını da cavablayıb.

- Püşkatmada Azərbaycan millisi düşəndən sonra reaksiyanız necə olmuşdu?
- Dediyim kimi, təhlükəli rəqibdi. Biz onların gücünün indiyə qədər göstərdiklərindən qat-qat üstün olduğunu bilirik və əminəm ki, sabah çox yaxşı oyun keçirəcəklər. Çox diqqətli olmalıyıq.

- İsveç və Slovakiya milliləri turnir cədvəlində eyni xala malikdi. Qrupun taleyini böyük ehtimalla top fərqi həll edəcək. Bu o deməkdi ki, sabahkı matçda hücumameyilli heyət və oyunla çıxacaqsız?
- Mentallığımız bizə hər matçda diqtə edir. Azərbaycana böyük hörmətimiz var, bilirik ki, onlar keçmişdə bizi məğlub ediblər, indi isə heyran olduğum, heyrətamiz və təcrübəli məşqçiləri var. Biz bura qələbə üçün gəlmişik.