“Zirə”ni kapitan kimi meydana çıxaran Qismət Alıyevlə “Şamaxı” ilə matçdan sonra ayaqüstü söhbətləşdik. Futbolçu həm bu oyunu, həm də avrokubok şanslarını dəyərləndirdi.

* Oyuna ciddi hazırlaşmışdıq. Avrokuboka vəsiqəni əldən verməmək üçün mütləq qələbə qazanmalıydıq. Şükürlər olsun ki, buna nail olduq. Qarşıdakı 3 oyunda da maksimum xal uğrunda mübarizə aparacağıq. Hələ heç nə itirilməyib. Əlimizdən gələni edəcəyik ki, 4-cü pilləni qaytaraq. Söz yox, "Qəbələ"nin də büdrəyəcəyini gözləməliyik.

* Peşəkar futbolçu həmişə daha yaxşı çıxış etmək üçün çalışmalıdı. Mövsümdə elə oyunlarım oldu ki, zəif çıxış etdim. Formamda eniş oldu. Amma əsas odu ki, üzərimdə işləyib komandama maksimum fayda verməyə çalışıram. Bu tempi qorumağı qarşıma məqsəd qoymuşam.

* "Zirə" ilə daha 1 illik müqaviləm var. Hazırda bütün diqqətimi çempionatdakı oyunlara cəmləmişəm.

* Hamımız istəyirik ki, millimiz daha yaxşı çıxış etsin. Avstriya və İsveçlə oyunlardakı uğursuzlardan dərs çıxarmalıyıq. Qarşıda Estoniya ilə matç var. “Dişimizə görə” rəqibdi, onlara qalib gəlməklə həm psixoloji cəhətdən bərpa olmalı, həm də turnir cədvəlində irəliləməliyik. Ümid edirəm ki, qarşıdakı oyunlarda millimiz daha əzmkar mübarizə aparacaq.

ABDULLA İSMAYILOĞLU