“Leykers” MBA-nın sərgi oyunu çərçivəsində evdə “Finiks”ə 114:118 hesabıyla uduzub. “Gölməçəsevərlər”in hücumçusu Lebron Ceyms 19 xal toplamaqla oyunun ən məhsuldar basketbolçusu olub.

MBA tarixinin bombardiri olan 39 yaşlı Ceyms karyerasında ilk dəfə oğlu Bronni ilə birgə parket üzərinə çıxıb. “Leykers”in 2024 draftında 55 nömrə altında seçdiyi kiçik Ceyms 13 dəqiqə 25 saniyə meydanda olub, 2 dəfə ribaund edib, xal toplaya bilməyib.

Lebron oyundan sonra oğlu ilə birgə meydana çıxmasını belə şərh edib: “Bu hadisə bir ata kimi mənim üçün çox şey deməkdi. Həyatımda belə hadisə olmayıb. Artıq oğluma təsir göstərə, onunla yaxşı və pis anları bölüşə bilərəm. Və nəhayət, birgə çalışmaq imkanımız var. Fikrimcə, bu, bir atanın arzulaya biləcəyi ən yaxşı şeylərdən biridi”.