MBA-da şok ilk: ata ilə oğul birgə oynayacaq
Nyu-Yorkda MBA draftı keçirilib. Tarixdə ilk dəfə draft iki günü əhatə edib. Tədbirin əsas hadisəsi isə “Leykers”in ulduzu Lebron Ceymsin oğlu Bronninin seçilməsidi. Məhz elə “gölməçəsevərlər” onu 55-ci nömrə altında alıb.
Bronni 2023/24 mövsümünü Cənubi Kaliforniya Universitetinin heyətində NCAA liqasında keçirib. O, 25 oyunda orta hesabla 4,8 xal toplayıb, 2,8 ribaund edib, 2,1 məhsuldar ötürmə verib.
2018-ci ildən “Leykers”in şərəfini qoruyan MBA-nın dördqat çempionu Lebron Ceyms əvvəllər müsahibələrində dəfələrlə rəsmi oyunda oğlu ilə birgə parket üzərinə çıxmaq arzusundan danışıb. Beləliklə, MBA tarixində ilk dəfə bir komanda ata ilə ilə oğul oynayacaq. Dekabrda 40 yaşını tamamlayacaq Lebron MBA-da 22-ci mövsümünü keçirməyə hazırlaşır. O, MBA-nın müntəzəm çempionatında keçirdiyi 1492 oyunda orta hesabla 27,1 xal, 7,5 ribaund və 7,4 məhsuldar ötürmə göstəricisi ilə yadda qalıb. Bu arada “Leykers” əsas ulduzuna 162 milyon dollarlıq yeni müqavilə təklif etməyə hazırlaşır. "Mundo Deportivo" xəbər verir ki, müqavilə 3 il müddətinə nəzərdə tutulub. Lebronun klubla hazırkı müqaviləsinin müddəti bu yay başa çatacaq.
“Leykers”in Bronnini draft etməsi Amerikada birmənalı qarşılanmayıb. Məsələn, MBA-nın məşhur eksperti Kolin Kauherd belə seçim üçün heç bir obyektiv əsas görmür:
“Bronninin draftda seçilməsinin yeganə səbəbi Lebronun oğlu olmasıdı. Yannis Adetokunbonun qardaşı heç vaxt “Miluoki”nin start heyətində oynamayıb, həmişə ehtiyatda oturub”.
MBA-nın agenti, Lebronun maraqlarını təmsil edən Riç Pol isə hesab edir ki, müştərisinin oğlu Bronni Kaliforniya klubu tərəfindən seçilməyi tam haqq edib:
“Bəli, Bronni atası ilə birgə oynamaq şansı qazandı. Ancaq hər şeydən əvvəl MBA-a düşməyi haqq edirdi. Atası ilə oynamaq imkanı isə əlavə bonusdu, tortun üzərindəki albalıdı. Hesab edirəm ki, Bronninin soyadına çox köklənməyə dəyməz. Onun necə çalışdığına baxmaq lazımdı. Bronni MBA-da oynamağı haqq edir”.
Daha bir məşhur amerikalı basketbolçu, hazırda televiziyada ekspert kimi çalışan Şakil O”Nil də “Leykers”in yeni oyunçusunun – Bronninin müdafiəsinə qalxıb:
“İstərdi ki, mənim “qohumuma” – Bronni Ceymsə yönələn tənqid dayandırılsın. O, uşaqdı, əla uşaq. İstədiyi yalnız oynamaqdı. Təəssüf ki, uşaqlarımız bizim etdiklərimizə uyğunlaşmalıdılar. Mən daim öz uşaqlarıma deyirəm: “Təzyiq o deməkdi ki, növbəti dəfə çörəyi hardan tapacağını biləcəksən. Mənim yanımda olmağın vacib deyil. İstəyirəm ki, sən məndən yaxşı olasan”. İndiki müzakirələrdə ən arzuolunmaz məqam odu ki, tənqidçilər Bronninin bu uğura yalnız atasının sayəsində nail olduğunu deyir. Amma ulduz oyunçuların uşaqları da nəyəsə anil olmaq istəyir. Bronninun parlaq nəticələr göstərəcəyinə inanıram”.
