Bilindiyi kimi, “Qəbələ” Samuel Tette ilə yollarını ayırıb.

Klub ötən mövsümün sonunda digər legionerlərlə razılaşsa da, 28 yaşlı hücumçu ilə müqaviləyə hələ indi qarşılıqlı razılıq əsasında xitam verilib. 2023-cü ilin sentyabrından “Qəbələ”də çıxış edən Tette 25 matçda 3 qol vurub.

“Football-plus.az” onunla söhbətləşib.

- “Qəbələ”dən ayrılığın indi rəsmiləşdi. Danışıqlar niyə bu qədər uzandı?
- Düzdü, uzun sürdü. Çünki rəhbərlik və mən mümkün olan ən yaxşı razılaşmanı istəyirdik. Hər ikimiz də sonda güzəştə getməli olduq və nəhayət, əldə etdik.

- Hansısa klubdan təklif almışdın və ya danışıqlar aparırdın? İndi harda oynayacağına qərar vermisənmi?
- Başqa klublardan gələn təkliflərlə bağlı indi açıqlama verə bilmərəm, çünki heç nə razılaşdırılmayıb. Hazırda azad agentəm, seçim etmək üçün vaxtım var.

- “Qəbələ”də keçirdiyin vaxtı necə xatırlayacaqsan, bura gəldiyin üçün peşman deyilsən? Klubdan və baş məşqçidən incidin?
- “Qəbələ”də keçirdiyim vaxt pis deyildi, eniş-yoxuşlar oldu. Amma təəssüflənmirəm. Hər şey, burda olanlar mənim üçün təcrübədi. Əlbəttə, premyer-liqada yaxşı çıxış edə bilmədiyimiz təəssüf doğurur. Mən nə rəhbərlikdən, nə də baş məşqçidən inciyirəm, futbolda nə baş verirsə, futbolda qalır.

- Burda olduğun müddətcə Azərbaycan klublarından təklif aldın?
- Azərbaycandan bildiyim heç bir təklif yoxdu. Dediyim kimi, zaman ayırıb özüm və ailəm üçün ən yaxşı qərarı alacağam.

- Azərbaycan çempionatına və ya hansısa klubun oyunlarına baxırsan, yoxsa maraqlanmırsan?
- Bəzi oyunlara baxıram, çox rəqabətli, maraqlı liqadı. Ona görə də həmişə maraqlanmışam. Xüsusilə “Qarabağ”ın avrokubok oyunlarını izləyirəm. Hər birinə uğurlar arzulayıram.

RÖYANƏ OĞUZ