Ötən həftəiçi Çempionlar Liqasında ''Arsenal''ın öz meydanında PSJ-ni 2:0 hesabı ilə yendiyi qarşılaşmanın ardından diqqətçəkən bir olay yaşanmışdı.

Oyunu VIP-lojadan izləyən tanınmış qaydasız döyüşçü, sabiq UFC çempionu Konor Makqreqor final fitinin ardından meydana daxil olaraq Bukayo Sakaya təpik və yumuruq atmağa başlamışdı. Düzdü, irlandiyalı döyüşçü bunu gülə-gülə və zarafat məqsədi ilə edirdi. Amma onun hərəkəti klub rəhbərliyinin kəskin narazılığına səbəb oldu.

İngiltərə mətbuatının iddiasına görə ''Arsenal'' rəhbərliyi məsələni araşdırmağa başlayıb. Onlar Makqreqorun meydana daxil olmağa icazəsi olmadığı halda meydana necə daxil olduğunu öyrənmək istəyir. Həm də bundan sonra rəhbərlik oyunların ardından ünlü isimlərin meydana çıxmasına birdəfəlik qadağa qoymağı planlaşdırır.

Olay sosial şəbəkələrdə də müzakirə mövzusuna çevrildikdən sonra bəlli oldu ki, Makqreqor və onun ətrafındakı insanlar bir şirkətdən ''Emireyts'' stadionuna VIP bilet əldə ediblərmiş. Həmin VIP biletə oyundan sonra meydana çıxmaq icazəsi də daxil imiş. Makqreqor da məhz bu fürsətdən istifadə edərək Sakanın yanına qədər gəlibmiş.

ƏLİ