“Mançester Siti”nin futbolçusu Mateuş Nunyeş başına iş açıb.

“El Mundo”nun məlumatına görə, 26 yaşlı yarımmüdafiəçi İspaniyada soyğunçuluq etdiyi üçün saxlanılıb.

Sensasion hadisə sentyabrın 8-də, Madriddəki “La Riviera” gecə klubunda baş verib. Nunyeş ayaqyolunda 58 yaşlı bir kişinin telefonunu əlindən alıb. Şahidlərin bildirdiyinə görə, zərərçəkən futbolçunun şəklini çəkməyə çalışıb. Çox əsəbiləşən Mateuş telefonu geri verməyəcəyini deyərək onun əlindən alıb.

Zərərçəkən polislə əlaqə saxlayıb. Polislər cihazı Nunyeşin üzərində tapıblar və onu bu səbəbdən saxlayıblar. Futbolçu daha sonra zaminə buraxılıb.

Nunyeş MS-də 2023-cü ildən oynayır. O, bu mövsüm bütün turnirlərdə 6 oyun keçirib və 1 qol vurub.