“Nyukasl”ın oyunçusu Camal Lassells silahlı hücuma məruz qalıb. Hadisə Nyukasl-apon Tayn şəhərinin mərkəzindəki küçədə baş verib.

“Daily Mail” qəzetinin yaydığı xəbərə görə, gecə klubunun yaxınlığında bir neçə nəfər futbolçuya və onun 19 yaşlı qardaşına hücum edərək onları güllələməklə hədələyiblər. Qarşıdurma hücum edənlərdən birinin dirsəyi ilə Camalın qardaşının boğazına bir neçə dəfə zərbə endirməsi ilə başlayıb. Şahidlərin bildirdiyinə görə, 29 yaşlı futbolçu hadisəyə müdaxilə edərək naməlum şəxslərdən birini itələyib. Onlar içində spirtli içki olan butulkanı Camalın başına tullamaq istəyiblər. Naməlum şəxslər əsasən onun qardaşına xəsarət yetiriblər. Qardaşlara hücum edənlər “təcili yardım” maşını gələnə qədər hadisə yerindən qaçıblar. Camalın qardaşı xəstəxanaya aparılıb. Polis hadisə ilə bağlı araşdırma aparır.

Qeyd edək ki, Lassells “Nyukasl”da 2014-cü ildən çıxış edir. O, bu müddətdə ağ-qara formada 225 oyun keçirib, 14 qol vurub və 4 məhsuldar ötürmə verib.