“Şahmat Olimpiadası Azərbaycan yığma komandasının uğursuzluğu ilə başa çatdı. İki ay idi federasiya və onların yanlış əməlləri ilə bağlı səssiz qalmışdım. Səbəb isə yığmanın uğursuz çıxışında məni ittiham edəcəklərindən çəkinməyim idi. “Komandaya psixoloji təsir etdi”, “əhval-ruhiyyəni pozdu” kimi fikirlərin gələcəyindən əmin idim. Hərçənd mənim federasiyanı tənqid etməyimin oyunçulara təsiri olmadığını düşünürəm.

İlk baxışdan Azərbaycan yığması 2022-ci ildəki Olimpiadadakı kimi 16 xal topladı və yarışı ilk “10-luq”da tamamladı. Amma nəticələr bənzər olsa da, hadisələrin axarı fərqlidi. Bu dəfə Azərbaycanın birincilik şansı 6-cı turdan, medal qazanmaq şansı isə 8-ci turdan sonra praktik cəhətdən bitmişdi. Halbuki 2022-ci ildə yalnız 10-cu turdan sonra bizim komandanın şansları qalmamışdı. Doğrusu, bu il Olimpiada 2022-yə nisbətən bir qədər daha güclü idi, amma bu, bizim bu dərəcədə zəif çıxışımıza əsas olmamalıydı.

“Yığmanın rəzil Avropa çempionatındakı çıxışından sonra dəyişim eşitmirəm. Heç nə dəyişməsə, 2024 Olimpiadasında da Avropanın bənzəri aqibət yaşanacağından narahatam.... Yığma komandanın ilk Olimpiada medalının qazanılması istənilirsə, bunun üçün dünəndən işə başlamaq lazım idi!” - bu fikirlər bu il fevralın 3-də “Azerisport” xəbər saytına verdiyim müsahibədəndi. Həmin müsahibədən sonra cənab Məmmədov (Şahmat Federasiyasının prezidenti Mahir Məmmədovu nəzərdə tutur – red.) məni komandadan diskriminasiya ilə xaric etməkdən savayı hansı addımları atdı? Olimpiadadan sonra yarışdakı uğursuzluğa görə hər hansı bir məsuliyyəti öz üzərinə götürəcəkmi? Yoxsa 2023-də olduğu kimi bütün məsuliyyəti oyunçuların üzərinə yıxacaq?”