“Polşa polisinə də hörmətimi çatdırmaq istəyirəm”
WBA, WBC və WBO versiyaları üzrə superağır çəkinin çempionu Aleksandr Usik çərşənbə axşamı Krakov hava limanında saxlanılıb.
"Football-plus.az" xəbər verir ki, bununla bağlı ilk xəbəri olimpiya çempionu və Ukrayna Ali Radasının deputatı Jan Belenyuk “teleqram” kanalında yayıb. Onun xəbərində idmançının saxlanılmasının səbəblərinin araşdırıldığı da deyilirdi.
Usikin nüfuzunu nəzərə alsaq, saxlanma ilə bağlı çeşidli versiyalar dərhal informasiya məkanını zəbt etdi. Əvvəlcə xanımı Yekaterina xəbəri şərh etdi:
“Hər şey normaldı, hər şey yaxşıdı. Aleksandr özü bir qədər sonra hər şeyi anladacaq. Bu məsələdə kriminal nəsə yoxdu”.
Bir qədər sonra “Baza” “teleqram” kanalı Ukrayna mediasına istinadla öz versiyasını ortaya qoydu:
"Aleksandr sürət limitini aşdığına görə Polşada saxlanılıb. Adı çəkilən qaynağın versiyasına görə, “Krakov hava limanına geçikən Usik icazə verilən sürət həddini çox aşmaqla lüks maşında az qala uçurmuş”.
“Onet” portalı isə Usikin saxlanılmasının səbəbi kimi reysə dostunun anlaşılmaz səbəbdən buraxılmamasına görə narazı qalmasını göstərdi.
İş o yerə çatdı ki, Ukrayna prezidenti Vladimir Zelenski də olaya biganə qalmadı, “teleqram” kanalında bunları yazdı:
“Saxlanılandan sonra Aleksandr Usiklə telefonla danışdım. Vətəndaşımıza və çempionumuza belə münasibət məni qəzəbləndirdi. Xarici işlər naziri Andrey Sibiqaya və daxili işlər naziri İqor Klimenkoya dərhal Krakov hava limanındakı insidentin bütün detallarını araşdırmağı tapşırmışam”.
Nəhayət, Usik özü də üzə çıxdı və hava limanındakı qalmaqalı belə anlatdı:
“Əziz dostlar. Anlaşmazlıq baş verdi və tezliklə aradan qaldırıldı. Narahatlığını göstərən hər kəsə minnətdaram. Effekli dəstəyə görə ukraynalı diplomatlara “sağ ol” deyirəm. Və Polşa polisinə də hörmətimi çatdırmaq istəyirəm. Polis adamın boyuna, çəkisinə, qolunun gücünə və titullarına baxmayaraq, vəzifə öhdəliklərini yerinə yetirir”.
Olayla bağlı daha iki versiya ilə tanış olaq. Polşa Dövlət Sərhədinin Mühafizəsi Xidmətinin mətbuat katibi Yatsel Mixalovskinin açıqlaması:
“Bu, saxlanılma yox, xidməti otağa aparılma idi. Aviaşirkət iki kişinin heç birini təyyarə reysinə buraxmadı, onlar sərnişin statusunu itirmişdi. Hava limanının mühafizə xidmətinin xahişinə baxmayaraq, yenə də təyyarəyə keçmək istəyirdilər. Sonradan bu işlə məşğul olmaq üçün bizi dəvət etdilər”.
Dünyaca məşhur ESPN xəbər agentliyi Usiklə bağlı belə informasiya yaydı:
“Usikə və məşqçisi Sergey Lapinə təyyarənin salonuna keçməyə icazə verilməyib. Aviaşirkətin nümayəndəsi onların uçuşun çətinliyinə dözməsinin mümkünsüz olduğunu bildirib. Usik halını Kiyevdən 14 saatlıq yolçuluq zamanı yorulmasıyla izah edib. Ancaq dil səddi ukraynalı idmançının saxlanılmasına səbəb olub”.
Xatırladaq ki, 37 yaşlı Usik Ukraynanın məğlubedilməz boksçusudu. Peşəkar rinqdəki karyerası boyunca 22 döyüşə çıxıb, bunların 14-nü nokautla bitirib. Aleksandr dekabrın 21-də Ər-Riyadda Tayson Füri ilə əvəzçıxma döyüşü keçirəcək.
Digər xəbərlər
