İtaliya futboluna ağır itki üz verib.

"Football-plus.az" xəbər verir ki, Milli komandanın sabiq hücumçusu Salvatore Skillaçi dünyasını dəyişib.

O, sentyabrın 18-də 59 yaşında vəfat edib. Futbol veteranı son illər müalicə olunduğu xərçəng xəstəliyinə məğlub olub. “Toto” ləqəbli Skillaçi 1990-cı ildə vətənində keçirilən dünya çempionatında nümayiş etdirdiyi məhsuldar oyunla məşhurluq qazanıb. O, həmin turnirdə 6 qol vuraraq mundialın bombardiri olub.

“Skuadra adzurra” DÇ-1990-da 3-cü yeri tutmasında böyük pay sahibi olan Skillaçi həmin il “Qızıl buts” və FİFA-nın “Qızıl top” mükafatına layiq görülüb. Maraqlıdı ki, o, milli komandada yalnız 1990-91-ci illərdə çıxış edib, göy formada meydana çıxdığı 16 oyunda 7 qol vurub.

Skillaçi peşəkar futbolçu həyatını 4 klubda keçirib. Ölkəsində “Messina” (1982-89), “Yuventus” (1989-1992) və “İnter” (1992-94), Yaponiyada isə “Cubilo İvata”ın (1994-97) formasını geyib.