“Albaniya çempionatında əsasən fiziki gücə üstünlük verilir” - “Bülis”də çıxış etmiş azərbaycanlı
Bilindiyi kimi, Amil Yunanov Albaniyanın “Bülis” klubu ilə sözləşməyə imza atıb.
Legioner həyatı yaşayacaq hücumçunun klubu bizə tanışdı. 2019/20 mövsümündə digər həmyerlimiz Eltun Turabov da “Bülis”in formasını geyib.
Albaniya çempionatı və başqa nüanslar ilə bağlı bilgi almaq üçün hazırda “Turan Tovuz”da çıxış edən Eltunla əlaqə saxladıq. Onun “Football-plus.az”a söylədikləri:
“Mən 4-5 il öncə həmin klubda oynamışam. Zədə üzündən geri qayıtdım. Klubun şəraiti orta səviyyədə idi. Başlayanda uyğunlaşmaq çətin olur. Amma insanları qonaqpərvər və ölkədə kifayət qədər gəzməli yerlər olduğu üçün müəyyən müddət sonra uyğunlaşmaq olur. Çempionatda əsasən fiziki gücə üstünlük verilirdi. Azarkeşlər hər oyunda çox fəal iştirak edirdi. Qeyd etdiyim kimi, 5 il öncə həm məşqlər baxımından həm də şərait baxımdan orta səviyyədə idi. Çünki mən ora gedəndə klub yeni formalaşmağa başlamışdı. Amil Yunanova uğurlar arzulayıram”.
RÖYANƏ OĞUZ
