Millimizin üzvü Vüsal İsgəndərli bir neçə gün öncə “Sumqayıt”ı Albaniya klubuna dəyişdi.

28 yaşlı hücumameyilli yarımmüdafiəçi “Eqnatiya” ilə ikiillik müqavilə bağladı. Futbolçu bu gün yeni komandasında məşqlərə başlayacaq. Bəs “Eqnatiya” necə tanınır? Hədəfləri nədi? İndiyə qədər hansı uğurlara imza atıb? Bu mövzunu araşdırdıq.

Klub 1934-cü ildə Albaniyanın Roqojin şəhərində “Ştator” adı ilə yaranıb. 1991-98-ci illərdə “Vullnet” kimi tanınan komanda daha sonra “Eqnatiya” adı ilə tanınmağa başlayıb. Roqojin sakinlərindən bir qrup futbol həvəskarının yaratdığı klub tarixindəki ilk matçda 1:7 hesablı məğlubiyyət yaşayıb. Növbəti illərdə formalaşdırılan heyətlə Albaniyanın 2-ci divizionunda çıxış edən komanda çətin dövrlərdən keçib. Yalnız 2003-cü ildə 1-ci diviziona yüksələn komanda 2004-də superliqada debüt edib. Elə həmin mövsümün sonunda yenidən aşağı dəstəyə yuvarlanıb. Klubun növbəti yüksəliş mərhələsi 2021-ə təsadüf edib. “Eqnatiya” həmin “futbol ili”ndən bəri elitadakı yerini qoruyub-saxlamağı bacarıb. Zaman keçdikcə turnir cədvəlində yuxarı pillələrə qalxan komanda 2022/23 mövsümündə 3-cü yerdə qərarlaşıb. Albaniya təmsilçisi bununla Konfrans Liqasına vəsiqə qazanıb. Komanda iyulun 13-də Ermənistan “Ararat”ı ilə qarşılaşmada avrokuboklarda debüt edəcək. Klubun rəhbəri Egim Demrozi, baş məşqçisi isə albaniyalı mütəxəssis Edlir Tetovadı. 40 yaşlı çalışdırıcı “Eqnatiya”ya yeni təyin olunub. Onun komandasında 20 futbolçu var. Heyət əsasən ortayaşlı oyunçulardan qurulub. Klub ev oyunlarını Roqojində yerləşən 4000 yerlik şəhər stadionunda keçirir.

Beləliklə, statistikalardan aydın olur ki, Vüsal İsgəndərlinin legioner həyatı yaşayacağı klub tarixinin ən parlaq dönəmini yaşamaqdadı.

KƏNAN BAHADIR