Premyer-liqa klublarında çıxış edən bəzi futbolçular ilk 5 turda özünü yaxşı göstərdi.

Belələrindən biri də “Səbail”in qapıçısı Hüseynəli Quliyevdi. O, “Football-plus.az”a müahibəsində bəzi maraqlı məqamlara aydınlıq gətirdi.

- 5 tur ərzində 3 məğlubiyyət, 1 qələbə və 1 heç-heçəni necə nəticə saymaq olar?
- Fasiləyə daha çox xalla getmək istəyərdik, amma alınmadı. Bununla belə, yenə də həvəsdən düşmürük və qarşıdakı oyunlar üçün çalışmağa davam edirik. Əslində daha yaxşı hədəflər üçün vuruşduğumuza görə bu nəticələr özümüzü də qane etmir. Bundan da yaxşı olacağına inanırıq.

- “Transfer pəncərəsi” hələ bağlanmayıb. Ölkə klublarından hansısa təklif almamısan?
- Mövsümün əvvəlində bəzi təkliflər var idi. Amma mənə doğma olan “Səbail”də qalmağı seçdim.

- Mövsümdən əvvəl belə fikir formalaşmışdı ki, bu il premyer-liqada qalmaq üçün mübarizə aparan klublardan biri də “Səbail” olacaq.
- Heç bir futbolçu istəməz ki, komandası aşağı pillələrdə qərarlaşsın. Bunun üçün də çalışırıq. Premyer-liqada çox keyfiyyətli komandalar var. Biz də bacardıqca daha yuxarı pillədə olmağa səy göstərəcəyik.

- Ötən mövsüm komandada Səlahət Ağayev var idi, sən az şans qazanırdın. İndiki performansın isə çoxlarını təəccübləndirir. Komandanızda qapıçılar arasında rəqabət var?
- Əlbəttə. Bundan əvvəl təcrübəli qapıçılar - Emil Balayev, Səlahət Ağayev ilə birgə olmuşam. Onların hər birindən nəsə öyrənmişəm. İndi də Əlirza Müştəbazadə var ki, çox perspektivlidi, həm meydanda, həm də kənarda mənə çox dəstəkdi. Eynilə də mən ona və Nicat Məmmədzadəyə dəstəyəm. Nicatın böyük qapıçı olacağına inanırıq. Milliyə dəvət hər bir futbolçunun arzusudu. Mən də istəyərəm yığmanın formasını geyim. Bu yolda əlimdən gələni edirəm.

- Fasilədən sonra “Qarabağ”la qarşılaşacaqsız. 3 xal ala bilərsiz?
- Bilirik ki, rəqibimiz nəinki Azərbaycanda, hətta Avropada sözünü demiş klubdu. Onlarla oyunumuz maraqlı olacaq. Ən yaxşı nəticəyə ümid edirəm.

RÖYANƏ OĞUZ