Cənubi Amerikada DÇ-2026-nın seçmə turnirinin qrup mərhələsinin 7-ci turuna start verildi. İlk iki oyunda meydan sahiblərinin böyükhesablı qələbəsi qeydə alındı.

Əvvəlcə Boliviyada keçirilən matç bir qədər gözlənilməz hesabla nəticələndi. Hər halda cari seçmə tsikldə çox yaxşı təsir bağışlayan Venesuela yığması ilk 6 oyundan yalnız birində uduzmaqla 9 xal qazanmış, qapısından 3 top buraxmışdı. Lakin Fernando Batistanın çalışdırdığı komanda El Altoda baş tutan oyunda özünə heç bənzəmədi. Boliviyalılar həm də dəniz səviyyəsindən çox yüksəkdə yerləşən məkanda özlərini nisbətən rahat hiss etmək kimi xüsusiyyətindən maksimum yararlandılar. 4:0 hesablı qələbə Boliviya yığmasını 9-cu yerdən 7-yə yüksəltdi.

Buenos Ayresdə keçirilən növbəti oyunun nəticəsi isə çoxları üçün təəccüb doğurmadı. Hərçənd Argentina yığması Çili ilə oyunun ilk hissəsində qapıya yol tapmaqda çətinlik çəkdi. Qeyd edək ki, “Monumental”dakı matçdan əvvəl yığma karyerasını başa vuran Di Mariya üçün mərasim təşkil edildi. DÇ-2022, Amerika Kuboku-2021 və Amerika Kuboku-2024-ün qalibi olan 36 yaşlı Anxelin milli formada 16 il ərzində meydana çıxdığı 145 oyunda 31 qol vurduğunu xatırladaq. Xüsusi tədbirin sonunda artıq sabiq oyundaşlarının qolları üzərindən havaya yüksələn Di Mariya tribunadan oyunu izləyərkən göz yaşlarını saxlaya bilmədi...

Argentinalılar çilililərin müqavimətini zədəli Messinin yoxluğunda yalnız fasilədən sonra qıra bildilər. İkinci hissənin əvvəlində Makallisterə məhsuldar ötürmə verən Alvares 84-cü dəqiqədə özü hesab arasındakı fərqi artırdı. Finiş ərəfəsində isə Dibala qonaqların darmadağınını rəsmiləşdirdi. Son dünya çempionu inamlı qələbə ilə liderliyini davam etdirdi.

Cənubi Amerika
qrup mərhələsi, 7-ci tur
Boliviya – Venesuela 4:0 (2:0)
Boliviya: Lampe, Akin, R.Fernandes (Pas, 75), M.Suares, Medina, Kuelyar, R.Vaka, Mateus (Kamaço, 85), Çaves (Xose Saqredo, 46), Alqaranyas (Monteyro, 75), H.Vaka (Terseros, 34).
Venesuela: Romo, Osorio, Ferraresi (Makun, 52), Navarro, Aramburu, Murilyo (Maçis, 46), Xose Martines (Soteldo, 46), Seqoviya, D.Pereyra (Kasseres, 58), Rondon, Kadis (Andrade, 66).
Qollar: R.Vaka, 13 (1:0). Alqaranyas, 45+5-p. (2:0). Terseros, 46 (3:0). Monteyro, 89 (4:0).
Vərəqələr: Kuelyar, 9. R.Vaka, 14. Kasseres, 78. Soteldo, 79. Monteyro, 90 - sarı.
Hakim: Vilmar Roldan (Kolumbiya).

Argentina – Çili 3:0 (0:0)
Argentina: E.Martines, Otamendi, Molina, K.Romero, Lisandro Martines (Akunya, 79), De Paul, Makallister (Dibala, 79), E.Fernandes, N.Qonsales (Lo Çelso, 51), Alvares (Kastelyanos, 89), Lautaro Martines (Qarnaço, 79).
Çili: Aryas, İsla, Katalan, Eçeverriya (Baesa, 72), P.Dias, Qaldames (Mena, 72), Loyola, M.Nunyes (Alarkon, 61), Osorio, E.Varqas (Brereton, 79), Davila (K.Palasios, 61).
Qollar: Makallister, 48 (1:0). Alvares, 84 (2:0). Dibala, 90+1 (3:0).
Vərəqələr: De Paul, 30. M.Nunyes, 39. Davila, 40. P.Dias, 65. Lo Çelso, 71 - sarı.
Hakim: Xesus Valensuela (Venesuela).

1. Argentina 7 6 0 1 11-2 18
2. Uruqvay 6 4 1 1 13-5 13
3. Kolumbiya 6 3 3 0 6-3 12
4. Venesuela 7 2 3 2 6-7 9
5. Ekvador (-3) 6 3 2 1 5-3 8
6. Braziliya 6 2 1 3 8-7 7
7. Boliviya 7 2 0 5 8-14 6
8. Paraqvay 6 1 2 3 1-3 5
9. Çili 7 1 2 4 3-10 5
10. Peru 6 0 2 4 1-8 2

Bombardirlər: D.Nunyes (Uruqvay) – 5, De la Krus (Uruqvay), Messi (Argentina) - 3.

Asiya
3-cü mərhələ, 1-ci tur
A qrupu
Özbəkistan – KXDR 1:0
Maşaripov, 20.
İran – Qırğızıstan 1:0
Taremi, 34.
Qətər – BƏƏ 1:3
Əl-Hassan, 38 – Suxail, 68. Xaled Ebraheym, 80. Saleh, 90+4.

B qrupu
Koreya – Fələstin 0:0
İraq – Oman 1:0
Hüsseyn, 13.
İordaniya – Küveyt 1:1
Əl-Ta’mari, 14 – Əl-Sulayman, 90+2-p.

C qrupu
Avstraliya – Bəhreyn 0:1
Suttar, 89-öz qapısına.
Yaponiya – Çin 7:0
Endo, 12. Mitoma, 45+2. Minamino, 52; 58. İto, 77. Maeda, 87. Kubo, 90+5.
Səudiyyə Ərəbistanı- İndoneziya 1:1
Əl-Cuvayr, 45+3 – Oratmanqoen, 19.

Okeaniya
1-ci təsnifat mərhələsi
Kuk adaları – Tonqa 1:3
Kumsuz, 63 – Tikoipau, 27. Polovili, 39-p. Kefu, 79.
Amerika Samoası – Samoa 0:2
Tumua, 59-p. Vaai, 90+7