DÇ-2026-nın Cənubi Amerikada startı sentybrın 7-də verilən seçmə mərhələsinin ilk turuna ertəsi gün yekun vuruldu.

"Football-plus.az" xəbər verir ki, ilk oyun günündə keçirilən üç oyunda yalnız iki qol qeydə alınmışdı. Ayın 8-də baş tutan iki oyunda qapı torları ümumilikdə 10 dəfə silkələndi.

Uruqvay – Çili matçı ilk növbədə argentinalı məşqçilərin dueli ilə yadda qaldı. Marselo Byelsanın çalışdırdığı ev sahibləri Manuel Beritsonun başçılıq etdiyi çilililərə 3:1 hesabı ilə qalib gəldi. Byelsanın veteran hücumçular Luis Suareslə Kavaninin xidmətinə ehtiyac duymaması diqqətdən yayınmadı.

Montevideoda keçirilən matçın qəhrəmanı isə iki qol vurub Valverdeyə məhsuldar ötürmə verən De la Krus oldu.
İlk turun Braziliyada keçirilən sonuncu oyunu da ev sahiblərinin qələbəsi ilə nəticələndi.

Boliviyanı 5:1 hesabı ilə darmadağın edən Braziliya yığmasının dünya çempionatının seçmə turnirində məğlubiyyətsiz oyunlar seriyası 35-ə çatdı. Bu, Cənubi Amerikada yeni rekorddu. Dünyada isə 3-cü ən yaxşı göstəricidi. İspaniya yığması 1993-2021-ci illərdə ardıcıl 66 matçda məğlubiyyətin nə olduğunu bilməyib. Almaniya isə 1934-85-ci illərdə seçmə turnirdə keçirdiyi ardıcıl 36 oyunda uduzmayıb.

Belem şəhərində qeydə alınan növbəti fakt daha cəlbedicidi. Dubl edən Neymar Braziliya yığmasındakı qollarının sayını 79-a çatdırdı. O, bununla əfsanəvi Pelenin rekordunu (77) yenilədi! Neymarın milli formanı 125, Pelenin 91 oyunda geydiyini də bildirək.