Bəli-bəli, nəhayət, bu gün 1-ci liqada yeni mövsümə start verilir.

Deməli, yerli futbolsevərlər futbol aclığını doyurmaq üçün həftəsonunu, yəni premyer-liqa oyunlarını gözləməli olmayacaq. Yeri gəlmişkən, yeni mövsümdən etibarən 1-ci liqanın bəzi oyunları "CBC Sport" vasitəsilə canlı yayınlanacaq. Bu dəfə televiziyadan izləyə biləcəyimiz oyunlar sırasında "Qəbələ"nin "Zaqatala"nı qəbul edəcəyi matç var. Əvvəlcədən qeyd edək ki, televiziyada yayınlanacaq qarşılaşmalar stadionların yayınla bağlı şəraitinə uyğun seçiləcək.
Qalan oyunları isə PFL-in "1-ci liqa/2-ci liqa" "yutub" kanalından izləmək mümkündü.

Görüşlərə gəlincə, ilk qarşılaşmada "Karvan" "Qaradağ Lökbatan"ı qəbul edəcək. Əldə etdiyimiz məlumata görə, meydan sahiblərinin hədəfi ilk "üçlük"dü. Kənan Kərimovun kollektivi yoxlama oyunu keçirməsə də, heyətdə cüzi dəyişiklik edildib. Lökbatanlılar isə çempionluq uğrunda mübarizə aparacaq. Azər Həşimovun komandasından yola salınan futbolçular daha təcrübəliləriylə əvəzlənib. "Baku Sportinq" (2:2) və "Cəbrayıl"la (1:2) yoxlama oyunları keçirilib. Belədə matçın gərgin mübarizə şəraitində keçəcəyini düşünmək olar.

"Difai" - "Cəbrayıl" matçı da baxımlı ola bilər. Hər iki komanda yay fasiləsindən maksimum yararlanmağa çalışıb. Heyətlərin yenilənməsiylə yanaşı, "Difai" "Şəfa" (2:1), "Baku Sportinq (1:0), "Sabah 2" (5:4) "Cəbrayıl" (3:4) ilə, "Cəbrayıl" isə bu rəqibdən başqa "Şamaxı" (0:4), "Səbail U-19" (7:0), MOİK (1:3), "Qəbələ" (2:5, 1:4),  "Baku Sportinq"lə (1:0) qarşılaşıb. Qarabağ təmsilçisinin yeni baş məşqçisi Elhad Nəziri yetərincə iddialıdı. "İmişli"nin "Baku Sportinq"i qəbul edəcəyi oyunda da prinsiplər toqquşacaq. Meydan sahiblərini çalışdıran Fərid Namazov hədəfin premyer-liqa olduğunu deyir. Eynilə qonaqların rəhbəri Elman Sultanov kimi. "İmişli" yoxlama oyunlarında "Mil Beyləqan" (10:0), "Şahdağ Qusar" (2:0), "Şimal" (3:0), "Zaqatala" (1:0), "Mingəçevir" (4:0), "Qəbələ" (2:0) kimi komandalarla qarşılaşıb ki, hər iki kollektivin heyəti yenilənib.

MOİK də yola çempion olmaq ümidiylə çıxır. Qəzənfər Abbasovun kollektivi ötən mövsüm olduğu kimi, bu dəfə də rəqiblərinə başağrısı olmağa çalışacaq. "Ordu klubu"nun "doğma divarlar" arasında qarşılaşacağı "Mingəçevir"də isə sular bulanıqdı. "Nur şəhəri"nin təmsilçisi maddi çətinliklə üz-üzədi ki, iddialı heyətin formalaşdırılması demək olar ki, mümkün olmayıb. Bu mənada "Qəbələ"ylə yoxlama matçını da (0:4) qabarda bilərik. Görünür, baş məşqçi Ədəhim Niftəliyevin işi çətin olacaq. Tura "Qəbələ" - "Zaqatala" matçıyla yekun vurulacaq. "Qırmızı-qaralar"ın məqsədi çempionluqdu. Yay fasiləsində keçirdiyi yoxlama oyununda "Əl-Yarmuk"la (Küveyt) "sülh"ə razılaşan (2:2) komanda qalan rəqiblərə qarşı müsbət nəticə əldə edib. "Qəbələ" həm də təcrübəli heyəti və baş məşqçisi Kaxaber Tsxadadze sayəsində nəinki ilk oyunun, çempionatın favoriti sayılır. "Zaqatala" isə "qırmızı-qaralar"la yoxlama oyunundan da məğlub ayrılıb - 0:2. Görək, rəsmi matçlarda hansı nəticələr qeydə alınacaq?

1-ci liqa
1-ci dövrə, 1-ci tur
11 sentyabr
Karvan – Qaradağ Lökbatan
Yevlax, şəhər stadionu. Saat 17.00

12 sentyabr
Difai – Cəbrayıl
Şamaxı, Olimpiya İdman Kompleksinin stadionu. Saat 16.30

İmişli – Baku Sportinq
Tovuz, şəhər stadionu. Saat 18.00

13 sentyabr
MOİK – Mingəçevir
Lökbatan, Olimpiya İdman Kompleksinin stadionu. Saat 17.00

Qəbələ – Zaqatala
Qəbələ, şəhər stadionu. Saat 17.00

KƏNAN BAHADIR