“Çelsi”də Roman Abramoviç dönəmi başa çatandan bəri nə rəhbərlik səviyyəsində, nə də nəticələr baxımından işlər düzəlmək bilmir.

Son 2 mövsümdə transferlərə xərclədiyi pullarla diqqəti çəkən London nəhəngi ilə bağlı yeni və fanatlar üçün heç də xoş olmayan şayiələr yayılıb.

Belə ki, İngiltərə mənbələrinin iddiasına inansaq, prezident Todd Boeli ilə “Çelsi”nin səhmlərinin 61,5 faizlik hissəsinə sahib olan “Clearlake Capital” investisiya şirkətinin qurucularından olan Behdad Eqbalinin münasibətləri gündən-günə pisləşir. Bu ikili bir çox mövzularda fikir ayrılığı yaşayır. Bura ilk növbədə “Stemford Bric”də aparılması planlaşdırılan yenidənqurma işləri aiddi.

Bundan başqa, ikilinin fikirləri bir sıra transfer məsələlərində də üst-üstə düşmür. Ona görə də iki tərəfdən birinin geri çəkiləcəyi və hissələrini satışa çıxara biləcəyi qeyd olunur. Amma “Clearlake Capital” birmənalı şəkildə bu layihədən imtina etmək istəmir. Şirkətin sahibi olan Beqdal Eqbali ilə Xose Felisianonun “zadəganlar”la bağlı uzunmüddətli planları var. Belədə bütün diqqətlər Boeliyə yönəlib. Onun öz səhmlərini məhz “Clearlake Capital”a satacağı barədə ciddi şayiələr yayılıb.

Anlaşmaya əsasən Boeli Eqbalinin razılığı olmadan öz hissələrini üçüncü tərəfə sata bilməz. Boeli hazırda vəziyyətdən çıxış yolu tapmağa çalışır. Bu vəzifədə olduğu 18 aylıq müddətdə çox da gündəmə gəlməyən və Eqbalinin kölgəsində qalan Boeli özü də etiraf edir ki, “Çelsi” hazırda düzgün idarə olunmur. Onlar arasında səhmlərin satılması ilə bağlı hələ ki, heç bir danışıqlar aparılmayıb.

50 yaşlı Boelinin yer aldığı ABŞ konsorsiumu Abramoviçdən klubu 4,25 milyard funt sterlinqə almışdı. Həmin vaxtdan bu yana “Çelsi” transferlərə 1 milyard funt sterlinqdən çox pul xərcləsə də, heç cür uğurlu nəticələr əldə edə bilmir.

Bu müddətdə baş məşqçs funksiyasını Tomas Tuxel, Qrem Potter, Frenk Lempard, Maurisio Poçettino icra edib. Hazırda isə “Çelsi”ni Entso Mareska çalışdırır.