''Çelsi'' ''Arsenal''ın gününə düşəcək
Məlum olduğu kimi ''Çelsi'' bu günlərdə rəsmi olaraq amerikalı milyarder, iş adamı və bir neçə şirkətin sahibi olan Todd Boeliyə satıldı.
Anlaşmanın dəyəri 4,25 milyard funt sterlinqdi. Bu arada ''Arsenal''ın sabiq futbolçusu, 1985-97-ci illərdə bu klubun şərəfini qorumuş və 6 titul qazanmış Pol Merson ''Çelsi''nin satışı barədə maraqlı fikirlər səsləndirib: ''Amerikalılar işə yanaşma tərzini dəyişməsə və uğursuz tendensiyanı dəyişməyə cəhd etməsə, ''Çelsi'' də ''Arsenal''ın gününə düşəcək. Düzdü, Todd Boeli ilə anlaşmanın əldə olunmasından sonra ''Çelsi''də hamı dərin bir nəfəs aldı. Çünki bundan sonra komanda ən azı yeni oyunçular ala biləcək. Amma məncə, yeni sahibi üçün ''Çelsi'' sadəcə bir oyuncaqdı. İngiltərə klublarına sahiblik edən digər amerikalı milyarderlərə diqqət yetirin. Onların Amerikadakı klubları hər zaman İngiltərədəki klublarından daha yaxşı çıxış edir. Necə olur ki, Sten Kronkenin sahibi olduğu komandalardan ''Los Anceles Rems'' superboulun qalibi olur, amma ''Arsenal'' premyer-liqada yalnız 5-ci pilləni tutur? Çünki onlar üstünlüyü doğma vətəndə uğur qazanmağa verirlər. İngiltərədə uğur qazanıb-qazanmamaq bu insanları çox da maraqlandırmır. Və ya Qleyzerlər ailəsinə baxaq. Onların sahibi olduğu ''Tampa Bey'' superboulu qazanıb. Bəs ''Mançester Yunayted'' sonuncu dəfə nə vaxt çempionluq uğrunda mübarizə aparıb? ''Çelsi''nin yeni sahibləri transferlərə Roman Abramoviç qədər pul xərcləməyəcəklər. O dövrlər artıq geridə qaldı''.
