Kaşuk “Qarabağ” üçün uğurlu transferdi? - "formada olmaması problem deyil"
“Qarabağ”ın yeni transferi hər kəs üçün surpriz oldu.
Aleksey Kaşukun Ağdam təmsilçisinə keçidini nəzərdə tuturuq. Təbii ki, Sabah”dan da yaxşı tanıdığımız futbolçunun gəlişinə sevinənlərlə yanaşı, qəzəblənənlər də tapıldı. Alekseyin “Qarabağ” üçün uğurlu transfer olduğuna dair şübhələr çoxdu. Ona görə ki, “Şaxtyor”dan ayrılandan sonra uzun müddətdi komanda məşqləri edə bilməyən ukraynalı əvvəlki formasından çox uzaqdı.
Bəs Kaşuku “Qarabağ” üçün uğurlu transfer hesab etmək olarmı?
Tanınmış menecer Ceyhun Sultanov “Football-plus.az”a açıqlamasında transfer barədə bu sözləri dedi:
“Kaşuku hamımız yaxşı tanıyırıq, nəyə qadir olduğunu bilirik. Onun formada olmaması problem deyil. Çünki formada olmayanda futbolçunu məşqlər və oyunlarla tədricən zirvəyə çatdırmaq olur. Düşünürəm ki, "Qarabağ"a lazım olan mövqe idi, yəni sağ vinger və solaxay oyunçu axtarışındaydılar. Həm də tanıdıqları futbolçudu. Fikrimcə, "Qarabağ" yaxşı seçim edib. Kaşuk formaya düşəndən sonra "Qarabağ" bəhrəsini görəcək. O, futbolçu keyfiyyətinə görə "Qarabağ" oyun üslubuna uyğundu. Məncə, "Qarabağ" yaxşı transfer etdi. Uğurlar arzulayıram”.
RÖYANƏ OĞUZ
Digər xəbərlər
