“Mən yeni mövsüm üçün komandamızı favorit saymıram. “Bavariya”nın titulu qazanmaq şansı daha yüksəkdi. Mövsümə yaxşı başlamaq və gözəl futbol oynamaq niyyətindəyik. Hədəfimiz ilk “4-lük”dəki yerimizi qorumaqdı. Bu, bizim üçün olduqca real hədəfdi”.

“Uşaq yaşlarımda ən çox sevdiyim oyunçu kim olub? İngiltərəli hücumçu Teddi Şeringemi çox bəyənirdim. Sonra Devid Bekhem mənim kumirim oldu (Keyn karyerasının çox hissəsini - 2013-23-cü illəri “Tottenhem”də keçirib. 31 yaşlı hücumçu “Bavariya”ya ötən ilin yayında transfer olunub – R.Y.). Uşaqlıq illərimdə Bekhemin dediyi hər şeyi edərdim. İndi özüm bir çox uşağın kumiriyəm və onlara yaxşı nümunə olmağa çalışıram. “Bavariya” ilə bundesliqanın və Çempionlar Liqasının qalibi olmaq istəyirəm. İngiltərə yığması ilə böyük turnirin çempionu olmağı çoxdan arzulayıram. Yeni mövsüm üçün hədəfim mümkün qədər çox titul qazanmaqdı”.

“Heyətimizin çox da geniş deyil. Cəmi 19, 20 və ya 21 futbolçumuz var. Matçların sayı isə çoxdu. Qrafik sıxdı. Deməli, hamı var gücü ilə mübarizə aparmalı olacaq”.

“Leao bu yay “Milan”ı tərk etməyəcək. Heç bir halda...”

“O, milli komandaya hələ də fayda verə biləcək gücdədi. Kriştiano klubunda əvvəlki kimi fəal çıxış edir. Ümumiyyətlə, yığmanın bütün oyunçularını diqqətlə izləyirik. Kriştiano kapitanımızdı, hazırkı fiziki göstəriciləri əladı. Onun işə münasibəti komandamız üçün çox vacibdi. Doğrudu, Ronaldo on il əvvəlki futbolçu deyil. İndi daha böyük təcrübə sahibidi. Onun yaşı haqda danışmaq lazım deyil (“Əl-Nəssr”in hücumçusu 39 yaşındadı – R.Y.), ona görə ki, ortada 41 yaşında builki Avropa çempionatını yüksək səviyyədə keçirən Pepe nümunəsi var. Kriştiano bundan sonra da gənc oyundaşlarına böyük təcrübəsi ilə kömək ola bilər. Onu da deyim ki, biz onu yığmanın digər futbolçuları qədər dəyərləndiririk. O, hazırkı göstəriciləri ilə Portuqaliya futbolunun ən yaxşı hücumçusudu”.

“Məqsədimiz yetərincə aydındı: biz indi meydanda oyunu idarə etməyi öyrənirik. Fikrimcə, topu özümüzdə saxlamağa can atmağımız yaxşı əlamətdi. Ola bilsin, bu, hərdən o qədər də faydalı olmur. Məsələn, matçın son 10-15 dəqiqəsində meydanın özümüzə aid olan hissəsində topa sahib olmağa çalışdıq. Halbuki bunu meydanın rəqibə aid olan hissəsində etməliydik. Bütün oyunçuların yeni oyun sistemini tam şəkildə öyrənməsi üçün daha çox vaxta ehtiyacı var. Bu gün onlardan bəziləri həm də fiziki planda çətinlik çəkdi. Komandamız matçın ayrı-ayrı məqamlarında topla və topsuz oyunu ilə xoşuma gəldi. Amma oyunumuzda problemlərin olduğunu da deməliyəm”.

“Feliş komandanı tərk edir? Tezliklə biləcəksiz. Söhbət onun başqa kluba transferindən gedir (portuqaliyalı hücumçu artıq “Çelsi”yə keçib – R.Y.). Mənə artıq bu barədə məlumat verilib”.

“Noyer artıq möhtəşəm çıxışı ilə milli komandanın tarixinə düşüb. Məncə, o, Almaniya futbolunun bütün dövrləri üçün ən yaxşı qapıçıdı. Manuel qapıçıların oyununa yeni element gətirib, onların oyununu yeni səviyyəyə qaldıra bilib və yeni standartlar müəyyənləşdirib. Bütün dünyada həmkarları onun oyununu nümunə kimi göstərirlər. Vəziyyətə Noyerin tərəfindən baxsaq, onun bundan sonra yalnız “Bavariya”nın oyunlarına köklənmək qərarı doğrudu. Manuel yeni mövsümün əvvəlkindən yaxşı keçməsi üçün əlindən gələni edəcək”.

“Meydanda həmişə əlimdən gələni etməyə çalışıram, var gücümü sərf edirəm. Qol vəziyyətləri yaratmağa çalışır və yeri gələndə komandamın arxa xəttinə kömək edirəm. Artıq dediyim kimi, bacardığım qədər faydalı olmağa can atıram. Yeni komandama da fayda vermək istəyirəm. Hədəfimiz titullar qazanmaqdı və mən Madridə bu hədəflə gəlmişəm. “Atletiko” tarixi ərzində çox sayda titul qazanan böyük klubdu. Birlikdə çoxlu kubok qazanacağımıza ümid edirəm”.

“İsveçrə yığmasındakı çıxışımı başa vurmaq qərarını vermişəm. Ölkəmin əsas komandasına uzun illər ərzində xidmət etməyi özüm üçün böyük şərəf sayıram. İsveçrəni 12 il ərzində beynəlxalq yarışlarda 94 oyunda təmsil etməyi böyük xoşbəxtlik sayıram. Qonşu Almaniyada keçirilən Avropa çempionatından sonra milli forma ilə vidalaşmaq vaxtının yetişdiyi qənaətinə gəldim. Ötən 12 il ərzində milli komandada mənimlə birgə oynayan futbolçulara və mənə dəvət göndərən məşqçilərə, dəstəyini hiss etdiyim azarkeşlərə və yaxınlarıma təşəkkürümü bildirirəm”.

“Bu mövsüm “Arsenal” “Mançester Siti”nin əsas rəqibi olacaq. Bu da var ki, Xosep Qvardiolanın komandaları çıxış etdikləri liqalardan asılı olmayaraq, demək olar ki, hər il əsas titulu qazanırlar. Onun qarşısını yanız “Real”la Joze Mourinyo ilə “Liverpil”la Yürgen Klopp ala bilib. Bu faktlar Qvardiolanın komandasına qarşı mübarizə aparmağın nə dərəcədə çətin olduğunu göstərir. “Arsenal” son iki mövsümdə “Siti” ilə çempionluq uğrunda yarışmağın necə çətin missiya olduğunu əyani görüb. Məncə, əksər neytral azarkeşlər bu mövsüm başqa komandanın çempion olmasını arzulayırlar. Elə mən də buna ümid edirəm. Çünki bir komandanın hər il əsas titula sahib çıxmasını stəmirəm. Amma istənilən halda “Siti”nin və Qvardiolanın qarşısında şlyapanı çıxarmaq lazımdı. Onlara qalib gəlib titul qazanmaq olduqca çətin işdi”.

“Fabreqas bizim üçün vacib futbol adamıdı. Çünki ona klubumuzun memarı gözü ilə baxırıq. Sesk baş məşqçi vəzifəsinə təyinat alarkən komandanın necə oynamalı olduğuna qısaca aydınlıq gətirmişdi. Onun məşqçi kimi düşüncələrini çox bəyənirik. Fabreqasa böyük inamımız və ümidlərimiz var. Ona görə ki, o, məşqçi kimi yalnız komandanı yox, klubu da inkişaf etdirməyi və yüksək səviyyəyə qaldırmağı düşünür”.

“Sevilya”nı tərk edən Ən-Nəsiri ilə müqayisə olunduğuma görə üzərimdə təzyiq hiss etmirəm. Hə, o, komandanın uğurları üçün çox iş görüb. Təəssüf ki, indi “Sevilya”da deyil və onun yerini mən tutmuşam. Bütün diqqətimi komandanın uğurlu çıxışı üçün əlimdən gələni etməyə yönəltmişəm”.

“Yeni baş məşqçimiz böyük istəyə və motivasiyaya malikdi. Tyaqo Mottanın başçılığı altında məşq etmək və oynamaq çox maraqlıdı. O, məndə uğur qazanmaq istəyi ilə çox böyük təəssürat oyadıb. Tyaqo Motta komandaya öz ideyaları ilə gəlib. Bizdən meydanda var gücümüzlə oynamağı və yeri gələndə potensialımızı aşmağı tələb edir. Məşqlərdə intensiv, ötürmələrdə sürətli oynamağımızı istəyir. Fiziki və taktiki cəhətdən çox çalışırıq. İşlərimizin yaxşı gedəcəyinə ümid edirik”.

“İstənilən halda “Siti”nin və Qvardiolanın qarşısında şlyapanı çıxarmaq lazımdı”