"Qarabağ" Çempionlar Liqası pley-off mərhələsinin cavab görüşündə Bakıda "Dinamo”ya 0:2 uduzmaqla turnirdə mübarizəni dayandırdı.

Ağdamlıların müdafiəçisi Bəhlul Mustafazadə matçdan sonra “Football-plus.az”a müsahibə verdi.

- Oyun haqqında nə düşünürsən?
- Yetərincə ağıllı və güclü komandaya qarşı oynayırdıq. Həqiqətən də keyfiyyət hiss olunurdu. Qalib gəlmək üçün əlimizdən gələni etməyə çalışdıq. Təəssüf ki, məğlub olduq. Edə biləcək bir şey yoxdu. Avropa Liqasına hazırlaşacağıq. Əlimizdən gələni edəcəyik ki, ötən mövsümdəkindən daha yaxşı nəticə göstərək.

- Ümumi hesab 0:5 oldu. Demək olarmı ki, "Dinamo" sizdən bir baş üstün idi?
- Deməzdim. Çünki səfərdəki matça da baxsaq, əlimizə düşən imkanları dəyərləndirsəydik, bəlkə də tam başqa ssenari ilə davam etdirə bilərdik. Cavab matçında da bizə qələbə lazım olduğu üçün daha çox irəli atılmışdıq ki, bu da arxa xətdə boşluqlar verməyimizə səbəb oldu. Birinci oyunda ələ düşən şanslardan istifadə etsəydik, daha fərqli nəticə olacaqdı.

- Qol vurmaq üçün təcrübə çatmadı?
- Yox, belə düşünmürəm. Bəzən olur ki, yüzfaizlik epizodları da dəyərləndirə bilmirsən. Təcürəbə deməzdim, sadəcə, şansımız gətirmədi. Son vuruşların üzərində də çalışmalıyıq.

- Xorvatiyadakı oyundan sonra da, oyunöncəsi mətbuat konfransında da Qurban Qurbanov nikbin görünürdü. 3:0-dan sonra mərhələ keçəcəyinizə ümid yaratmışdı. Mərhələ keçmək üçün nələr etmək lazım olduğunu demişdi?
- İlk növbədə əlimizə düşən şansları dəyərləndirməliydik. Bugünkü oyunda da şansımız oldu. Zaqrebdəki matçdan sonra bir-birimizlə danışdıq ki, hələ heç nə bitməyib. İnanırdıq ki, cavab matçında daha yaxşı nəticə əldə edəcəyik. Amma alınmadı.

- Avropa Liqası yeni formatda keçiriləcək. Sənə maraqlıdımı?
- Əlbəttə, bu ilkdi. Düşünürəm ki, maraqlı olacaq. Avropa Liqasında çox oyun keçirmək bizim üçün yaxşıdı. Faydalı olacağını gözləyirəm.

RÖYANƏ OĞUZ