Macarıstanda Albaniya və Qazaxıstan ilə qarşılaşan futbol üzrə milli komandamız artıq vətəndədi.

"Football-plus.az" yığma üzvü Bəhlul Mustafazadə ilə bu oyunlar ətrafında söhbətləşib.

- Hər iki oyunda ilk dəqiqələrdən geri düşsəz də, Qazaxıstanla matçda geri dönüş etməyi bacardız. Albaniya ilə oyunda bunu etməyə nə çatmırdı?
- Qazaxıstanla müqayisədə Albaniya daha yaxşı təşkilatlanmış, yetərincə güclü komandadı. Bundan başqa, Avropa çempionatında çıxış edəcəkləri üçün daha motivasiyalıydılar. Sadəcə, Albaniya ilə oyunda əlimizə düşən şansları dəyərləndirə bilmədik. Hər iki oyunda komandamız yaxşı futbol sərgilədi. Lakin biz bəzən çox elementar qollar buraxır və əlimizə düşən fürsətləri dəyərləndirə bilmirik.

- İlk görüşdə zədələndin, ikincidə iştirak etmədin.
- Hazırda durumum yaxşıdı. "Qarabağ"ın toplanışına kimi tam hazır olacam.

- Öz performansından razı qaldın?
- Yox.

- Arif Əsədovdan nələr öyrəndiz?
- Arif Əsədov yerli məşqçidi və daim milli komandanın formasının ağırlığını bizə xatırladırdı. Bundan başqa, bizə dominant futbol oynamağı tapşırırdı. Düşünürəm ki, yığma Arif müəllimin rəhbərliyi altında yaxşı futbol sərgiləyə bildi.

- Dünən milliyə yeni baş məşqçi təyin olundu. Fernando Santuşun gələcəyini gözləyirdinmi? Səncə, necə seçimdi?
- Bir qədər gözlənilməz oldu. Yeni baş məşqçinin təqdimata ehtiyacı yoxdu. Hədəflərimizi böyütməliyik. Məncə, uğurlu nəticəyə imza atmağın vaxtıdı. Ümid edirəm ki, yeni məşqçi ilə bunu bacararıq.

GÜNAY SÜLEYMANOVA